我求大俠無意導人迷信，但樸茨茅夫今屆喺英超戰績令人意外之餘，前鋒簡奴暫時更以7球領先射手榜，佢日前就自爆球會成功秘訣─「賽前祈禱」！「神佑我們」真係有根有據㗎！
連同上周六主場搞掂雷丁，樸茅仍能位列聯賽「４哥」，陣中30歲嘅前尼日利亞國腳簡奴，頭、腳皆能，入球數字領先緊安祖莊臣、朗尼同杜奧巴等高價球星，佢日前就口癢透露，佢同隊波嘅走勢係上帝保佑所致！簡奴同求大俠講：「我係基督徒，平日總愛祈禱。」
原來，樸茅每日比賽前，連同簡奴，仲有包括後衞派密斯、路亞和蘇甘保等8名主力成員，會齊齊向天禱告；簡奴話齊齊同上帝傾偈呢種集體活動，令到隊波更團結，精神更集中，每次出場都打高幾皮。聽落又係有道理喎！
南韓02世盃都靠呢招
我求大俠記得02世盃時，南韓每次贏波後，都有6、7個球員即刻跪喺草地祈禱，加埋前土耳其教練根尼斯（幫國家隊入到02世盃4強嗰個），都要求國腳賽前祈禱（當然唔係基督教），有理由相信一切紅塵世事並非巧合咁簡單！好喇，我求大俠唔想做傳教士，還勸各位球迷做多啲善事，就有好報㗎喇。
「求大俠奉勸一眾大人細路，禱告或可令大家做嘢事半功倍，但千萬別忘記呢啲成功人士背後付出咗好多血和汗，先有今日成果，唔溫書想攞A？妄想！」