發展商賣樓成日標榜係豪宅，搞到全港都係豪宅區咁，到底點先叫豪宅呢？asurada98喺香港討論區話：「以前所謂的豪宅，應該是單位好大，附近環境清靜，地點多數係半山，九龍塘等地方，但最近本人見到，灣仔188向鵝頸街市方向行，有一個新地盤...我估係啲唔太大的單位，上面廣告寫住『精品豪宅』，對他們來說，豪宅的定義，會否是『啲人好豪咁買個細單位住宅』呢？」問題一出，即刻引起唔少留言。fwho好激動咁話：「𠵱家豪宅嘅定義係...拎五百萬出來，買一個五百呎單位，點知你同你屋企人，平均活動空間得五十呎...即係好豪咁送啲錢畀發展商，買一個連張梳化都擺唔落嘅住宅咁解。」聽落都幾悲哀。
甜心先生查過豪宅嘅定義：「政府產業處網頁資料：住宅單位呎數除以住戶人數，每人有500呎便為之豪宅！即兩人家庭起碼要住千呎先係豪宅！！」政府01年都公布過，豪宅即係500萬以上嘅樓，𠵱家啲新盤下下幾千蚊呎，唔怪之得啲發展商都話賣豪宅啦。