越秀投資（123）今年1月由0.71元低位起步，5月中最高升到1.88元，經過一輪急升後，股價喺1.21至1.66元間形成上升通道，上星期五以大陰燭跌8仙，收報1.47元，單日跌幅逾5%，險守上升軌支持。有貨喺手嘅散戶，應該繼續揸，抑或回頭是岸？
「香港討論區」入面，網友myself2005話，剛剛喺1.46元買咗3萬股，佢想知隻股仲有冇機會再升，定係應該及早跳車？
自言喺呢隻股輸咗唔少錢嘅SHAW落力畀意見：「123唔應該叫做地產股，係叫綜合股……計劃年內分拆新聞紙業上巿，雖然表面上各方消息都有利股價，但現方向炒純地產概念居多，龍頭股較優先的為688（中國海外），123變相落後，股價波幅亦大（向下），宜待確實分拆再追入亦唔遲，你入咗123，試試等消息出，但真係要set止蝕位，技術走勢差勁。」
zoom138對呢隻股嘅評語亦麻麻哋：「呢隻嘢冇眼睇，我$1.64入，掂一掂$1.6，又俾人大手沽，大戶好似沽極都沽唔完……上次落過$1.44，我守住唔放，點知今次$1.6又衝唔破！」
其實純睇基本因素，越投有賣點，例如擁有龐大資產，股價較NAV折讓差唔多3成，折讓高過同業，又有分拆新聞紙製造業務憧憬，DBS唯高達上月底發表報告，重申「買入」評級，目標睇1.8元。
不過，唔少中資股上星期五嘅走勢都幾肉酸，越投難逃一跌，純睇技術走勢，現價入市要有好大勇氣。隻股上周五跌穿保歷加通道中軸，險守上升軌支持，一旦跌穿埋10月低位1.43元，要去到1.30元至有較大支持，𠵱家MACD喺0線附近糾纏，後市欠明確，未係入市博反彈時機，有貨喺手，最好見有反彈即沽。
余文