鍾意食火鍋，對小肥羊呢個名都真係又愛又恨；味道唔錯，不過價錢就稍貴，正所謂一分錢一分貨嘛！
最近網友chung818發現，荃灣小肥羊玩任食火鍋！記者都打過去查證，店員都答話：「冇錯！星期一至五，成人$98、小童$88任食3個鐘，但星期六、日就冇任食火鍋優惠；而且只此荃灣分店，其他旺角、銅鑼灣店都冇做！」
chung818好搞鬼，食完之後仲話做咗個試食報告：「今晚3個人去咗小肥羊任食火鍋（$98一位），6點準時到達，已見有40人喺門口等位，好彩已訂位；入到去已坐得七七八八，睇到張Order紙先知任食唔包括新鮮羊肉，肥羊粉又話賣晒，有啲失望！」「不過，佢送咗一盤海鮮拼盤（唔多新鮮）、烤羊棒（味怪）同新鮮羊脊肉（好食），然後再叫其他嘢食，一般火鍋嘅食物都有，不過無海鮮，佢啲料用好細嘅碟上㗎，我哋叫鱔佢一碟得3片（一人一片），大家去食不妨order多啲，因佢出嘢出得幾慢；總括啲火鍋食物都算新鮮，湯底好正呀！食完唔口渴，就快無湯時加番啲上湯落去（唔係水），態度唔錯，係落單慢咗啲，我會畀80分。」至於飲品方面：「無得任飲㗎！散叫喇，價錢合理！」如果想食「平版」小肥羊，chung818仲有一個好介紹：「深圳小肥羊我都試過，一樣好正，咁當然平香港一半喇！」
就chung818嘅食後報告，感覺都幾全面，而且整體感覺都幾正面；任食火鍋，樣樣細細碟、出得慢（據知好些舖仲會漏單）都情有可原；不過就肥羊粉一樣，老實講好多人上去食，都話係必試！但6點幾已話斷貨，喺預料方面真係要好好檢討吓。
記者：朱崇德
小肥羊火鍋荃灣分店（29407678）
地址：荃灣眾安街68號荃灣城市中心1期5樓5B號舖
香港討論區： http://www9.discuss.com.hk/viewthread.php?tid=2629315&extra=page%3D1