蘋果波神遠赴英倫度假，今日〈投資通勝〉由小弟暫代。亞洲盤只有贏同輸，較易看出一支球隊的強弱走勢；好多球迷都鍾意睇盤做人，捉水位、捉邊間公司開唔開盤；其實站在莊家立場，一支球隊無論太強勢同太弱勢，都唔係太健康，因為啲飛會側埋一邊，莊家就要承受輸錢風險；相反只要球隊一季做到贏輸盤保持50、50，抽幾個水，以一場過百萬投注額，莊家已經好和味。
所以除了一些神奇異軍，令莊家走漏眼，愈贏愈順，或者一些球隊有嚴重問題，長輸長有，否則一般健全球隊都離不開50、50概念。如果根據呢個概念，大家上周就捉到利物浦波盤齊贏。
利物浦未對阿士東維拉前，已經聯賽3場不勝兼輸盤，英超9場賽事更加有7場賽事輸盤，輸盤達77%；以利物浦人腳及級數，又沒有嚴重傷兵或內部問題，已達輸盤率不合理水平。今戰主場對阿士東維拉，莊家已明顯看好主隊，以海外亞洲盤計，竟讓賽前未嘗1敗的維拉多達1球；結果上半場紅軍已攻入3球，輕鬆開出上盤。
博曼聯長路有時盡
當然博弱勢球隊反底外，亦可博強勢球隊斷路；以曼聯為例，自9月23日迫和雷丁後，英超已4連勝兼贏盤，總計10場英超比賽，贏盤賽事達8場，高達8成贏盤率，屬超高水準，有斷路危機；曼聯周六主場對樸茨茅夫，讓球至少達一球以上，曼聯未必可贏兩球以上。文：牽牛