美股升得好哋哋，上周五突然腳軟，道指跌咗70幾點，雖然唔係跌咗好多，但係啲美元係咁俾人質，都係要小心啲。
平時睇美股，投資者都會睇住啲經濟數據、企業盈利同埋啲通脹數字，再估吓啲利率點走，不過，無論有幾多嘢講，事後睇番，都係借嚟炒短線，要睇美股嘅大勢，其實千祈唔好漏咗美元滙價呢樣嘢，因為美國赤字龐大，啲美元跌得多，必定會增加資金外流嘅風險，到時就好多瓣都唔掂，到時美股點會好？香港人炒股票對於滙價風險好少理，因為習慣炒港股，以港元買賣，自然唔習慣諗呢樣嘢，不過，基金啲錢就係無國界嘅，東奔西竄，邊度有錢搵就去邊度，對沖基金更加如是，既然係咁，就必須避免賺咗資產價格但係就輸咗滙價，因此，滙價嘅變化係機構投資者一個好重要嘅考慮。
事實上，自從美國聯儲局停止加息後，吸納債券嘅基金已明顯增加，上個禮拜聯儲局又唔加息，仲有啲暗示話加息周期已完結，啲美元梗係俾人插，但係如果呢個真係市場嘅諗法，即係話開始估美國幾時減息，啲美元嘅走勢就好值得留意。
中電信C輪4982：中電信（728）上日報收2.89元，股價喺10月份兩次下試20日線都有強大承接，上個禮拜由20日線彈番上10日線上面，個勢好好，就算上個禮拜五個市晏晝回得急，中電信都企得好穩，整固後應該可以上試3元，破位睇3.20元。C輪4982上日收13.3仙，槓桿率21.7倍（有效12.2倍），對沖值0.56，正股見3元同3.20元，隻輪應該唔會低過20仙同35仙，正股跌穿2.80元止蝕。
俊 樺