「投資特攻隊」今次向歐冠盃賽事出擊，重點推介今日有天時地利人和優勢嘅主隊薩克達，喺到訪嘅華倫西亞身上取得不敗戰果，博開「讓球」受讓半球下盤。冷選提供明日秩序，敲AEK雅典主場摸和里爾。文：華度
𠵱家香港正處涼秋，雖然仲有啲熱，不過天氣清爽；但東歐嗰邊，氣溫已經跌到攝氏零度以下，逐漸迎來風雪連天嘅嚴冬。據報今日薩克達主場鬥華倫西亞，當地傍晚時分氣溫，將為攝氏零下3度，對於烏克蘭球隊及球員嚟講，喺呢啲情況下落場比賽，已經算係一種享受；但對於華倫嗰班長年喺氣候和暖得多環境下比賽嘅西班牙仔嚟講，應該唔會好受。
薩軍佔盡天時地利
薩克達有「天時」及主場「地利」之助，「人和」都有；現時陣中都有啲具份量好手，例如羅馬尼亞前鋒馬歷卡、巴西中場伊蘭奴及馬度沙林、以及尼日利亞靈活前鋒阿加賀華等，星光熠熠程度未必比得上華倫，但亦唔可以睇小。
華倫方面，今仗未能「夫添」，中場球員維辛廸、謝美加維蘭及艾比達、巴拉查、中堅馬真拿等，全部有傷在身。
華倫1分夠數就住踢
再計吓數，其實今日華倫即使取得和局拎到1分，而另邊廂羅馬主場對奧林比亞高斯，只要出現主隊不敗正路戰果，華倫已經夠分贏到呢組出線權。所以，華倫呢場其實未致於非勝不可，作客讓住對手半球嚟踢，呢個上盤真係應晒今日萬聖節個feel，搵鬼捧嘞。
今次冷選方面，搵嚟聽晚嘅歐冠盃秩序，博希臘球隊AEK雅典主場打和法甲聯里爾。里爾目前喺H組取得不俗出線優勢，今次挾上輪主場贏過AEK雅典3:1氣勢，打和都有對賽成績方面嘅爭出線着數，一於博和波。
投資特攻隊金句
華倫呢場其實未致於非勝不可，作客讓住對手半球嚟踢，呢個上盤真係應晒今日萬聖節個feel，搵鬼捧嘞。