已經講到厭、講到噚嘅GST，唔知點解，喺《施政報告》都講到厭、講到噚之後，又死灰復燃。大家可能會話：「唓！GST犯眾憎，一早已經打殘咗啦，使乜驚喎……」相信大家講到個「喎」字嘅時候，背脊即刻涼咗截，因為工聯會最近轉軚挺曾，其他「冇脊椎」同類，又會點呢？哈、哈！
好嘞，悲觀啲睇，就當嗰班政客全部都董建華上身，唔理政治同經濟後果，GST最後符碌過關，咁正在搵工，又或者騎牛搵馬嘅你，又應該點「裝備自己，迎接挑戰」呢？
相信大家都知道，香港仲係殖民地嘅時候，係冇咁多政治分餅活動。你問點解？一來，嗰時係由鬼佬做大官，身為華人嘅你，夠唔夠膽去圍港督府，然後同港督講：「我要同你分身家！」另一個更重要嘅原因，就係殖民地政府根本冇錢，直到最後一任嘅「肥彭」留低咗「埃及妖后以來最大嫁妝」畀我哋嘅特區政府，啱啱拎咗「大紫荊」嘅董生，嗰時先至有塊大餅去「貢獻香港」，而未能「獲得貢獻」嘅朋友，亦都爭住去搶，卒之搞到董生腳痛，曾生攝位上任。𠵱家高官話唔夠錢所以要開GST，開口埋口話政府有所謂「結構性財赤」，其實就係「政府錢太多，個個都伸手要攞，引致財赤」咁解。所以，結論就係，塊餅愈大，就愈多人走去分。據我哋特區一位面部比較長嘅官員所講，開徵GST之後，原先三千幾億嘅餅，會大多二百億。嚟到呢度，大家可能會問：「咁關我搵工乜事呀？」
咁開GST之後，邊行會最發呀？公民黨嘅譚香文議員舉手搶答：「係會計界！」啱就啱，不過如果你可以忍受每日朝九晚n嘅生活，咁我都唔阻你。計我話，最發就梗係Lobbyist，工作就係專幫唔同階層，例如工商勞工以至重慶咖喱界，以偉大嘅理由去分納稅人塊餅嘅一啲代表。既然香港回歸咗祖國，又咁重視香港傳統，我姑且將佢譯做「搶包山專員」。各位填緊表，正想報「四大會計」bigfour嘅朋友，另一邊有一行，無啦啦多咗二百億喎，如果最後得二百個人做，一人都有一億啦，份工係咪好吸引先？
大家又可能會問：「點解『搶包山專員』嘅工作性質，同𠵱家都有嘅某一行咁似嘅？」冇錯，「搶包山專員」，又名立法會議員，月薪五萬五港元，福利、津貼等另計，全、兼職均可，月薪一樣。