今日萬聖節，梗係想同一大班Friend玩到癲！但係未搵到地方蒲？老蘭又驚人多？有個新食店好介紹！帝都酒店新開咗間One+OneBar，可以20個人一齊唱K、酒廊聽LiveBand表演、喺園林BBQ，每人都係$220落樓，平時唱K都要呢個價啦！一於Call齊人今晚出發！
記者：朱崇德
攝影：楊錦文、朱崇德
近年沙田市中心商場周圍改改拆拆，就算地頭蟲有時都覺得去咗LostWorld！帝都酒店貼住沙田中央公園嗰邊都圍晒板，最近終於開咗間One+OneBar；每次傍晚行過都聞到陣陣酒香肉香，原來可以喪玩露天園林BBQ！雖然望唔到河景，不過同城門河只係一箭之隔，晚來涼風颯颯，玩露天燒野餐真係爽爆；西餐廳行政總廚Eric都話：「自從沙田茵餐廳同雍雅山房冇做之後，沙田好似忽然冇晒露天式餐廳！其實沙田呢邊，入夜之後河風幾爽吓！」
園林BBQ有人服侍
11月都嚟緊，不過行街仍見人着短衫短褲，BBQ真係絕不好受！自己燒就話辛苦啫，呢度嘅園林燒烤，全部由廚師代燒，絕對係帝皇式享受。至於種類方面，主要係豬、牛、羊同海鮮類，雖然唔講得有好多選擇，但勝在用酒店扒房靚料，$48至$78一碟，自己去BBQ嘅話幾時用過咁靚料！
聽LiveBand逛酒吧
在落地玻璃一窗之隔，就係酒吧，每晚6時後就有樂師彈琴伴唱，粵語流行曲、國語舊歌，仲有人即席點唱，愜意之處是兩邊落地玻璃作開放設計，唔似一般酒吧有侷促之感。
卡拉OK唱成晚
卡拉OK在餐廳最深層，又用隔音密封設計。基本上每晚6點過後可以開Band，最夜可以唱到1:00am（假日2:00am）；不過開房設有最低消費，就係$4,000/20人（連加一服務費為$4,400），以食飯、飲酒唱卡拉OK嚟計，都唔算太貴！至於曲目方面，以電腦存曲點歌自助式，有4,000餘首選擇，試玩食客表示：「同出面嘅卡拉OK比，一定唔及佢哋咁快咁新；不過連衞蘭嘅《MyLoveMyFate》都有得點，都已經好過好多酒廊卡拉OK，不過最過癮都係獨立房，又有40吋大LCDTV，玩得特別投入。」
牛肉彩椒串燒$78
呢度嘅熱賣貨！椒香滲入肉香，特登以牛肉做串燒，$78兩件就貴咗啲，不過料錢貴，冇法！
鯧魚$78
相信唔係好多人試過燒鯧魚，富貴之處是用游水生口魚做，燒出嚟甘香滑口，完全冇泥味。
蝦串$78 焗蠔$48
活蝦、鮮蠔做炭火燒，呢兩味連殼燒就最入炭火味，同出面食焗蠔完全兩回事，惹味香口好多。
牛脷$48
牛脷厚切，但一樣好入味！阿廚話：「厚切感覺會有咬口啲，燒出嚟又唔會太亁身。」
阿LO：牛脷咁難入味都俾佢做到！而厚厚感覺有口感，又唔會覺得韌。
UBI：牛肉串好嫩滑，加咗椒粒同洋葱特別惹味。
阿茵:原來燒鯧魚可以咁滑，一致認為最好食！
JOEY：我覺得蠔最正，啱啱熟！表面剛剛收亁水，裏面好Juicy。
北京烤鴨批薩$58
中式Pizza以北京烤鴨、唐芹、中蒜、辣椒、葱等做配料，最鬼馬係汁醬以海鮮醬代替，西菜中做Crossover。
脆皮德國豬膝$68
先用雜菜、香料將豬膝燜至軟身入味，以冰糖、蜜糖等塗上皮燒至脆身，每日限售8隻，非常搶手！
雜錦芝士拼盤$68
芝士伴酒好地道西人風味，酒保話送白酒伴食最啱；合桃能增酒味甘香、葡萄能清清口腔味蕾。
抵玩攻略
卡拉OK房設最低消費，星期日至四為$4,000/20人、星期五、六及公眾假期前夕為$6,000/20人；由於今天係閒日，所以只需$4,000；不過入餐廳前，先講明訂卡拉OK房，之後叫所有的食物及飲品，都會計入最低消費中。
食物：14道菜（包BBQ及酒吧送酒菜）$2,000
酒水、果汁40杯$2,000
加一服務費$400
合計$4,400（20人）
每人平均消費：$220
搵食資料
店舖名稱：One+OneBar
查詢：26943869
地址︰沙田白鶴汀街8號帝都酒店大堂
座位︰70個
交通：九廣東鐵（出閘後穿過新城市廣場及西田直達）
最好賣：脆皮德國豬膝