近年本地最搶手嘅行業，相信離唔開會計界，尤其是不少內地公司已來港上市，仲有一大堆排住隊話嚟上市，因此唔少本港會計師都要長駐內地，有見及此，香港會計師公會特別喺北京開設辦公室，除咗聯絡會員外，仲可以同內地會計業加強合作同交流。
噚日呢個辦公室就喺北京舉行開幕禮，北京方面有前財政部長劉仲藜出席，馬時亨及梁振英就特登由香港飛上去做主禮嘉賓，會計師公會會長陳茂波當然要恭候。咁啱遇上霍英東喺北京病逝，梁振英作為政協常委，當然要回應幾句，而肥仔馬噚日主持完儀式後就即刻飛返港，冇陪同霍老遺體今日運返港。
10年後內地人才南下
公會陳會長原來早兩日已到埗，因為中聯辦組織咗一個高層次嘅香港會計專業代表團訪京，會有國家領導人接見。今次訪京，公會仲同中國註冊會計師協會簽署合作備忘錄，計劃未來10年為內地培養1500名可以攞到香港會計師資格嘅註冊會計師。香港公會與中註協亦會對成績優異嘅的學員給予獎勵。
陳會長話，內地對通曉國際財務準則嘅會計師需求好大，今次兩地合作，為內地培養會計業人才提出明確日程，最緊要係可以幫到一班內地專業人士，學到國際經驗和攞到多啲實踐機會嘛。當佢哋攞得香港會計師專業資格，就可以服務喺香港上市嘅公司，唔使話現時嘅國企唔夠合資格專業會計師。
咁咪同香港嘅會計師爭生意？不過都起碼係10年後嘅事，香港會計界朋友，好趁呢10年諗諗計。
[email protected]