高盛證券近期頻頻出報告講澳門概念股，最先係上星期走訪剛開業嘅銀娛（027）旗下星際酒店及娛樂場後，指首日賭桌入座率高達90%，但認為仍需一段時間才能確認此高入座率。高盛又發現永利及金沙等高質素娛樂場入座率未有受星際開幕影響，反而低素質娛樂場入座率則輕微下降，給予銀娛9.2元目標價。
歐陽風呢兩日都有去澳門玩，現場所見，星際賭場以人頭計的確唔少，不過有啲地方仍待改善，例如燈光太暗及空氣唔夠流通，賭得兩手好易眼瞓。相對之下，唔使5分鐘「步程」嘅永利，空間感、裝修都好得多，裏面名店林立，另門口有個幻彩噴水池，已成為遊客景點之一，星際單靠抽獎一招，似乎欠些少「籌碼」同永利長期爭客。
至於最新報告，高盛就話澳門樓巿正醞釀另一輪升浪，主要受博彩及旅遊業支持，隨着負擔能力提升及優質物業增加，將刺激用家及投資者需求上升，預期未來3年澳門樓價會升50%。
大股東頻頻增持
買樓3年回報50%，的確非常吸引。高盛特別提咗幾隻澳門股，包括豐德麗（571）、保利達（208）及九建（034），其中豐德麗短期升幅太多，要等項目陸續落成至有得諗；保利達雖長線睇好，但評級只係持有，目標價2.45元。澳門地產股高盛獨睇好九建，認為現價較NAV出現較大折讓，建議買入，目標睇17.65元。
近月九建頻頻見大股東增持，短線或者真係諗得過，14元附近可以買多少，止蝕13.32元。
歐陽風