周中歐冠盃最強戲碼，首推巴塞隆拿主場對車路士，車路士上仗就憑眾志成城，主場擊敗巴塞，今次輪番巴塞主場，巴塞為出線為名譽，點都秤先多少，今次一於推介朗拿甸奴首名入球。
「細哨」上次對碰表現奇差，成為輸波罪人，不過以佢球王身份，又點會衰多次，上次聯賽對維爾瓦，已喜見佢先開紀錄；講真車路士上次用保拿路斯成功凍結佢，奇兵只可用一次，今次細哨睇通晒，應該可以發番一次圍，首名入球熱熱哋6.5倍，捧得過。
里昂原本係歐冠盃分組賽大藍籌，3戰全勝兼贏埋盤，不過先有射手費特因傷長唞，近勢已有放緩，上周中盃賽已經完場前先入兩粒，險勝巴黎聖日耳門，星期日又僅勝南錫；今次對基輔戴拿模，都係求1分出線，有冇必要大勝呢？基輔講真出線機會已經渺茫，不過歐冠盃分分鐘都係錢，今次都要博，冷敲6倍和波。
吼修咸頓贏2:0
最後英冠聯賽事，修咸頓雖說兩連敗，不過都只屬作客，主場有番多少威力，狼隊擺明靠主場搵食，作客可以放心捧佢對家；修咸頓近3季已有2次主場以2:0擊敗狼隊，一於再追呢個8倍波膽。
文：牽牛