連《MGS》創作人小島秀夫都讚口不絕嘅《SplinterCell》，將隱密潛入玩到出神入化，更幫XBOX谷起唔少銷量，實在係標叔叔一員猛將！新作率先喺XB360推出，但今時唔同往日，主角為瓦解邪惡組織，居然要學《無間道》咁做卧底索料兼犯案，仲要學《逃》咁玩埋獄中龍，可算食晒電影熱門橋段！
文：陳福榮
學㗎仔玩前傳
《SplinterCellDoubleAgent》雖然至到第四集，不過學咗日本仔咁玩前傳；故事仲早過PSP版前傳《Essentials》，換言之即係「前前傳」！所以冇加咩新招落去，對老手嚟講確係唔夠過癮，有啲場景仲幾熟口熟面，好似拎番剩餘物資加以修改而成，只係靚啲囉。話雖如此，但《DoubleAgent》始終係Fans望穿秋水之作，正所謂爛船都有三斤釘，唔計畫面靚咗，仲有唔少靚女喺途中幫手，以前得一支公係咁衝係咁殺，𠵱家有美相伴個感覺都叫正常番啲，起碼冇咁齋先啦。
為破案不惜殺人放火
今集背景講為政府做嘢嘅「特務之王」SamFisher，無啦啦俾人屈咗入監獄度索料，因緣際會下識咗班大哥，包括爛仔同極難搞嘅恐怖分子。為咗保家衞國，Sam哥做埋雙重間諜，務求將擁有大殺傷力兵器嘅組織一網打盡！基於二五仔唔似以前做特工咁見人就射，所以每着都要諗過度過，既不可違抗大佬意旨，又不能濫殺無辜，真係左右做人難！例如大佬叫你開槍殺人，雖然事成會獲得惡勢力信任，不過就令政府懷疑你嘅忠誠，反之唔郁手大佬就知你係二五仔，真係搞到兩邊不是人！
為令大家知道自己係咪變質，遊戲設有道德計，做親令兩邊勢力唔妥嘅嘢都會係咁扣，兩邊扣晒就即時GameOver，所以要把握機會領功增加番啲好感。
任務更富變化多花臣
今集乃首次進軍XB360，唔計仲未見街嘅PS2、PC等版本，單係XB360版已令唔少機迷讚不絕口。比起同廠年初強作《GRAW》亦都唔太輸蝕，算為炮製佢嘅Ubisoft上海開發室爭番一口氣。點解咁講？皆因《SC》第二集係出自佢手，當年有人狂踩大陸冇好嘢，𠵱家睇番《DoubleAgent》呢句話真係唔多成立，始終過咗咁耐製作小組唔係冇成長嘅。
一直以來《SC》好重視隱密潛入時嗰種仔細光源效果，今次雖然冇早幾集令人嘩然大叫咁勁抽，但佢踏實得嚟仍保持高水準，加埋720p嘅高清威力，絕對稱得上符合次世代標準，呢點肯定贏稍後推出嘅PS2及GC版九條街。亦因為畫面得到進一步強化，任務設計唔再局限於「黑麻麻」嘅陰暗密室內，預計將有黃沙滾滾嘅戶外游擊戰，以及喺冰天雪地暗殺士兵嘅惡劣場景，尤其後者，唔留心仲以為自己玩緊《RainbowSix》㖭！
PC版要等多幾日
Ubisoft不嬲都唔興畀一部機玩獨佔，所以絕大部份重頭戲都會跨平台推出，今次《DoubleAgent》除咗360之外仲會有XBOX、PS2、GC、PC，同埋即將面世嘅PS3及Wii次世代版本，但搶先見大家嘅依然係XB360，咁樣都叫幾唔話得㗎啦。話雖如此，其實唔少忠心支持者都係玩開PC版嘅，因此網上就不斷有人抱怨「幾時先有得玩」，呢點唔使擔心，聽聞11月頭佢就會殺入本港，諗咁多不如Check吓部腦到底夠唔夠Power玩到今集先啦！
至於網上連線可算花咗唔少心思，唔單只可同機友互片，甚至一齊合作對付班上晒腦嘅瘋狂僱傭兵，唔再係純粹玩閃避，變化更多提高耐玩性。而主軸故事則依然係由十多個任務組成，十零粒鐘應該爆到機，抵唔抵玩真係見仁見智。
PROFILE
《SplinterCellDoubleAgent》
遊戲類型：動作
對應機種：XB360、XBOX、PS2、
PC、GC
遊玩人數：1人（Live支援6人）
開發廠商：Ubisoft
行貨售價：XB360版賣$299，其餘未定
