恭喜！恭喜！繼祖雲達斯喺假波案獲減刑後，「金童」廸比亞路前日對費辛隆尼（Frosinone）射入效力祖雲達斯第200球，獲得多國體育媒體大事報道。入波入到呢個數當然唔簡單，但咪話我求大俠掃興，如果佢有得揀，都未必想喺意乙，特別係對一隊似人名多過隊名嘅球隊達成呢個目標。
求大俠不嬲追捧廸比亞路呢類技術型球員，亦欣賞佢長期效力同一間球會嗰份忠誠，但諗深一層，佢今次突破200大關就未必好似想像中咁大件事！講到尾，以祖雲達斯嘅人腳，喺意乙聯擺明係虎入羊群，佢今季係咁意（唔係我講，係佢隊友查斯古特早排話踢意乙太輕鬆）踢7場波就有3個入球。只要肉緊啲，呢個球季仲有大把入波機會；大吉利是講句，如果祖記升唔番上意甲，佢入球肯定更多啦……。
祖記減刑施文唔高興
咪以為求大俠針對祖記，真正同呢隊波過唔去嘅人係意乙萊切教練施文。呢位前羅馬教練咁多年都話人家嘅球員曾經服食禁藥；好啦，祖記喺今次假波案上訴得直獲減刑，施文呢個潮州怒漢自然咬住「老婦人」唔放，話判決唔公道。
「我求大俠幾乎每個禮拜都會提吓祖記。話時話，真係期待祖記同萊切下個月交鋒，包保打鑊勁！如果有得睇就好囉……。」