無綫噚日派發2007年藝員月曆，每年邊個喺月曆邊個唔喺月曆，都代表住嗰個人嘅受捧指數，馮仁昭就發現呢個07月曆有幾個特別地方。
首先無綫每年都會搵應屆港姐三甲嚟做月曆封面，但今次打破往常慣例，封面竟然唔係佢哋，即係話應屆港姐冠軍陳茵媺、亞軍周家蔚同季軍呂慧儀被飛出局。馮仁昭聽到話因為呢啲月曆通常係送畀無綫客戶，而每年做封面嘅港姐啱啱選出嚟冇乜人氣，送畀客戶之後啲人總係將封面張海報撕走，所以無綫決定唔搵港姐影海報，寧願搵番啲小生花旦好過。
至於取代港姐做封面嘅16位小生花旦，全部都係無綫重點力捧，好似郭羨妮、廖碧兒、郭晉安、佘詩曼、胡杏兒同鄭嘉穎，阿佘則被安排喺中間位置，又係1月份嘅月曆人物，明顯備受無綫重視。
鄧萃雯回歸
另外，睇番07年個月曆好似冇乜藝員被一筆勾銷，連被傳同無綫關係麻麻嘅鄧萃雯都「曆」上有名！而最特別嘅地方係今年女星落足力，好似黎姿、蔡少芬同胡杏兒等都為公司拋胸出嚟，認真唔錫身。
