陳奕迅（Eason）前晚在新加坡室內體育館出席音樂頒獎禮，勇奪四項大獎，成績優異，他更揚言有幸目睹容祖兒走光，大呼「唔好彩」，被對方勸以碌柚葉洗眼。不過其後Eason領獎時卻幾乎被煙花弄傷，享完艷福即嚇餐飽。
陳奕迅前晚到新加坡出席「第六屆全球華語歌曲排行榜」頒獎禮，捧走最佳男歌手、最受歡迎男歌手五強、最佳專輯及一首金曲獎四項大獎，開心之餘又有艷遇，事緣穿短裙的容祖兒行樓梯上台領取最佳女歌手獎時不慎走光，被坐在台前的Eason看個正着。
「冇睇到啲乜」
祖兒在慶功宴上說：「我蹦蹦跳跳又冇打底，行樓梯走光呀，Eason同我講話佢睇到一秒呀，佢真係要攞碌柚葉洗眼。」Eason則說：「係睇到呀，好唔好彩。」問他是否真的覺得不幸？Eason想想後才笑說：「唔係，係佢唔好彩，不過佢個人咁活潑，唔會介意。」那Eason可要洗眼？他說：「唔使，佢蝕啫，其實都冇睇到啲乜，條裙揚一揚，如果佢喺香港就危險，一定有人影到。」
其後Eason上台領最佳男歌手獎，獻唱完畢即到台邊拿回放下的獎座，剛好旁邊的煙花筒爆出強勁煙花，他火速彈開，表情錯愕，幸沒有受傷，事後Eason說：「好危險，其實大會有通知我會有煙花，但我唔知喺邊，嗰刻真係俾佢嚇一嚇。」
向華仔學習
另外，劉德華奪最受歡迎男歌手、最受歡迎男歌手五強、香港地區傑出歌手、最佳專輯及一首金曲獎五項大獎成為大贏家，談到Eason威脅他的地位，華仔說：「我都同啲歌手傾開，話大家應該喺華人音樂上做多啲嘢。」在旁的Eason插嘴道：「我哋要向佢好好學習，年年都係佢攞亞太歌手都悶啦，我哋會爭氣。」華仔笑說：「咁我會乘住個浪而行，唔會死碰，我係順水嘅舟，Eason張國語碟做得好好，我喺台灣都有介紹畀人聽。」華仔透露正努力作曲填詞，欲自薦做08年奧運的主題曲。
採訪：王連連 攝影：陳偉權
