俗語都有講「唔怕生壞命，最怕改壞名。」改樓盤名好考技巧，改得差真係俾人笑足成世，網友jp3係《香港討論區》搞咗個「最差樓盤名選舉」，邀請各方網友提名兼發表意見，部份真係相當搞鬼。
第一個俾人鬧到暈嘅盤名就係「都會駅」，發展商想搞gimmick，用個日本字做盤名，不過網友似乎唔多接受。bb_chuchu就炮轟，駅字根本唔係中文字。呃post王就擺到明話唔識讀，「所以我通常讀成『都』、『會』、『馬』、『尺』四個音。」唔止中文名，網友三級警司就連英文名「LePoint」都要彈，「最憎啲發展商用法文當英文，一日到黑以為法國好高尚。」
夜晚返浩園嚇親司機
唔講唔知，原來元朗有個盤叫做浩園，無錯！同安葬殉職公務員嘅浩園一模一樣。呢個名亦都嚇窒唔少網友，咁又係，如果問人哋住係邊，聽到「浩園」呢個答案，真係唔知佢講真定講笑，夜晚搭的士更分分鐘嚇死個的士司機大佬，以為撞到嘢。
另外，一眾以「半島」為名嘅盤，都俾網友笑稱做「半倒」，認真唔老泥。仲有好多盤俾人改花名，例如漾日居被改成「樣樣衰」、翔龍灣變「長聾灣」、好多樓蟹嘅一號銀海，就慘變「一號火海」或者「一號銀主」、雍雅軒變「youare癲」、泓都變「暈都」、嵐岸同牽晴間調轉讀就變「戇男」同埋「姦情軒」......各位發展商，下次為新盤命名前可以考慮將個名post上討論區，測試吓網友嘅反應，費事到時畀人彈到暈喇！