心情大起大跌。本來收到Panasonic全球最細最輕嘅3CCDDV做測試，理應開心至係，但聽新聞知道天星碼頭要搬家，當堂冇晒心機。每年聖誕，筆者同家人例必到中環天星坐小輪睇燈飾，可惜今年再冇呢支歌仔唱。唉！一切已成定局，我呢啲小市民今日可做嘅，就惟有用部能夠拍出DVD畫質嘅3CCDDV，記低天星一草一木，留個美麗回憶。
記者：陸俊雄
攝影：何家亮
ImageGirl：Becky
即拍報紙檔強哥
呢位強哥就係碼頭前報紙檔老闆。上船前例牌行去佢檔口，睇吓有咩新書好買。平時除咗畀錢找錢，都無同佢交談過，今日終於多口問佢：「碼頭搬你會點？」強哥話：「檔口唔會跟埋搬過新碼頭喇，一來新位冇錢賺，二來新檔口派去邊由政府話事，唔捨得都冇辦法。」筆者順手拎起Panasonic部最新嘅3CCD攝錄機S150拍低呢段真誠嘅對話，作為留念都好吖。
返到屋企抆番張SD卡就可抄段片出嚟，已經毋須用Firewire插一輪又轉格式咁麻煩。睇番段片，當時光線不足有少少雜訊無可避免，不過聲畫整體表現都唔錯，雖然人來人往幾嘈雜，光線又不足，不過開着夜攝模式同雜音減少功能嚟拍攝，出嚟效果仍相當不俗。
操作簡易女士最啱
睇晒市面上所有3CCD又插得SD卡嘅DV，Becky手上呢部S150，確係現今最輕最細嗰部。其實呢樣已經夠晒做賣點，啱晒女士袋喺手袋隨身拍，點知部機操控方式更係何其容易，真係令人一拎上手就唔想放低。
好似S150個OIS防震，基本上一早預設咗啓動中，你唔鍾意用喺Menu度熄咗佢又得。去到碼頭當然要坐船，Becky就喺船上試過開住OIS影皇后碼頭，再用10倍光學變焦Zoom埋去，出來效果理想，完全唔覺佢當時身處喺又搖又震嘅環境下。防震、變焦、影相，3個步驟其實都喺機背兩個大圓圈掣上做晒，除非你唔曉分上下左右，如果唔係冇可能唔識用。其次部機有個「SoftSkin」模式幾好用，同樣靠圓圈掣做嘢，專門幫你影靚女沙龍相。用防震加埋佢玩自拍，Becky食自己唔靠人，照樣影到自己靚樣。
新功能實試
SoftSkin模式實試
專門喺影人時用，膚色自然地偏紅，而柔和效果拍出嚟人都靚啲。
船上照拍唔怕搖
有OIS光學影像穩定系統，喺船上又搖又震情況下，拍攝都冇有怕。
碼頭隨影
影相友唔信 3CCD可以咁輕巧
唔知係咪大把影相友都唔捨得天星碼頭，Becky去到當日，周圍有人拎住DV、相機喪影一餐。有位拎住DSLR相當專業嘅仁兄，見Becky手上部細機幾好玩咁，走嚟問佢係咩機種。話佢聽係Panasonic最新3CCDDV，拍片兼影相，佢第一個反應係：「3CCD出到咁細喇咩？」之後佢拎上手拋咗吓，坦言感覺真係好輕，不過佢加咗句：「300萬像素太少啦，我想曬大海報留念，都係用番單鏡機算。」
PROFILE
感光元件：310萬像素3CCD
鏡頭：LeicaDicomar
（F1.8至F2.8）
顯示屏：2.8"LCD
儲存媒體：SD/SDHC卡
體積：49.9×96.7×80.4mm
重量：243g
查詢：28330955
