上星期三跑夜馬之時，電台新聞報道老牌豪宅愛都大廈火警，因有幾位老友住響愛都，聽到之後，心裏為之一動，掛住佢哋嘅狀況。後來回心一諗，愛都大廈內猛人如雲，警方、消防，必定好緊張，幾時輪到自己驚起嚟！
次日，碰到住在愛都嘅富翁C，佢話當晚不在家，聽到太太電話，急忙趕返屋企，消防人員已控制火警，知道冇事；不過有一樣好弊，就係電梯停開，而佢住在極高層，點上番上去會妻呢？一把年紀，冇理由行三十幾層樓梯㗎，邊度有氣呀？於是想話打電話book酒店房，與老婆暫別一晚，但老婆因見到濃煙向上湧而受驚，自己一個人走咗去酒店，唔係幾好喎！
好彩，有猛人睇住電梯維修，菱電啲夥計好快就湧到嚟修理電梯，以第一時間將電梯恢復正常運作。菱電老闆胡法光住在極高層，如果冇電梯，佢老人家點可以上樓？
此乃有猛人關係之好處。回想左丁山舊居所三年前壞咗電梯，業主委員會要慢慢等保險公司檢查、批准維修費，竟然唔肯畀錢立即搶修，累到所有住客日日行上樓梯，年老長者有如坐監。卒之等咗成個禮拜，兩部電梯先至有一部恢復運作。假如胡法光與左丁山是鄰居，邊度有電梯失靈咁狼狽呀？
左丁山對富翁C講：「住低層有一個好處，就係逃生容易，你話住喺八樓以下，哪怕電梯失靈。」富翁C話：「你知道價格分野嘅話，就唔會咁講。愛都大廈啲高層有海景可睇，一間貴成二千萬㗎！」
立即翻查地產物業廣告，發覺愛都大廈高層，有海景嘅，售價成四千萬以上，低層不能望海景，只望到人哋廚房廁所嘅，賣二千零萬，可見「無敵維港景」價值二千萬元！富翁C在佳寧風暴之時買入愛都大廈一單位自住，便宜到極，至今已經賺咗十一、十二倍，故此佢好慶幸當年冇貪平買入低層單位。