煲呔同太太噚日留喺澳門，送外母羅瑞珍最後一程，話晒都係自己媽媽，曾太梗係比煲呔更唔捨得同更傷心，喺棺木落葬嗰一刻，戴住太陽眼鏡嘅曾太忍唔住喊出嚟。雖然喪禮以佛教儀式進行，但信奉天主教嘅煲呔入鄉隨俗，喺外母墓前上香。
噚日朝未到9點，煲呔夫婦已經去到澳門鏡湖殯儀館打點一切，佢細佬曾蔭培、唐英年媽媽唐尤淑圻、滙豐大班鄭海泉夫婦同自由黨梁劉柔芬都特登由香港過海參加，呢幾個都算係煲呔忠實朋友，反而民建聯、工聯會呢啲要堅定支持特區政府嘅左派，呢兩日既唔見人嚟，花牌又唔見；就連煲呔嘅大友好、澳門地膽賭王燊哥都冇去殯儀館，澳門博彩亦冇代表嚟，真係令人有少少意外。
輕拍太太安慰
鄭海泉夫婦去咗靈堂冇耐就走咗。鄭大班話，話晒同煲呔咁多年朋友，又同煲呔嚟過澳門，點都要過嚟慰問一吓，但因為太太下晝喺明愛有個賣物會要幫手，所以都要趕住走，但有人同八方講，噚日兩點仲見到鄭大班喺港澳碼頭，唔知係咪臨時有公事，要喺澳門留多陣呢？
參加大殮儀式嘅大部份都係鮑家親屬，到咗瞻仰遺容嗰一刻，啲親屬同曾太都有啲激動，告別儀式之後，煲呔夫婦同啲家屬跟埋殯儀車去舊西洋墳場，佢哋成程都好沉默，當啲工友將棺木放落個墓度，曾太好傷心咁喊出嚟，煲呔細細力拍吓佢，埋好個棺木後，佢哋就輪流上香。
曾太嘅大佬鮑馬壯話，媽媽平時同啲仔女打成一片，當年個女嫁畀煲呔，媽媽都好信個女嘅決定，因為佢哋兩個認識好耐、情投意合，亦都冇叫煲呔唔好蝦佢個女。送完外母最後一程後，煲呔一家先返去換衫，跟住就食解穢酒，下晝就返香港。
