早排學聯因為同特首曾蔭權會面，搞出連場風波。香港大學學生會鬧學聯已經變質，打算喺校內搞公投決定係咪退出學聯。學聯上星期六開會，傾港大退出學聯嘅問題。身為學聯代表會會長、港大學生會前會長嘅陳啓業好黯然，早就留低封辭職信辭去學聯職位。
話說陳啓業𠵱家喺保釣號上，但早喺佢上船之前，已經下定決心辭職，保衞釣魚台梗係重要過去學聯開會解釋辭職嘅決定啦！港大學生會又會喺兩星期後，就係咪退出學聯喺校內搞個公投。八方聽到其他院校嘅學生代表講，到時諗住去港大反宣傳，希望港大同學支持團結、唔好退出學聯。到底學聯會唔會無咗個咁重要嘅院校代表，睇怕都要到時先至可以揭盅。