黯然下台嘅老董噚日回歸禮賓府，千祈唔好以為佢又入主中原，其實只係攞大紫荊勳章。其實今次老董大把理由唔出席，其中之一係因為之前公布佢嘅受勳次序，竟然排響李業廣同李東海之後，衰衰哋都係前特首，咁做就分明落佢面。點知呢，神奇嘅事發生喇，老董噚日變咗第一個上台受勳，全因大會臨時補鑊。政府話，因為老董係政協副主席，所以今次受勳都可以行頭，仲話呢樣嘢同之前公布嘅次序無任何關聯喎。
八方睇番受勳片段，煲呔幫老董扣完個勳章之後，就肉緊地握手，老董仲挨埋煲呔耳邊講咗一句嘢（唔好意思，八方唔識讀唇），之後嚟個大熊抱後再握手笑笑口，不過兩個人嘅笑容都有啲牽強。
事後煲呔送老董行出後花園見傳媒，不過就響最後關頭交唔足戲。首先煲呔同老董隔到離行離列，向記者讚完老董為港盡心盡力後，到人哋開聲講嘢時佢即刻攝返入後面嘅人群，搞到老董講講吓擰向隔籬望一望先知佢閃咗，個樣幾咁尷尬。
媽打受勳開心到暈
噚日所見，老董瘦咗少少，精神咗，多咗幾條皺紋。不過佢除咗腳痛，八方懷疑佢仲有撞聾。事緣當記者話外界對佢受勳好多爭議，問佢點睇時，佢就將隻手擺響耳邊答：「唔係好聽到喎。」就算記者再追問沙士等敏感問題，佢都紋風不動，甚至無啦啦轉話題。
佢話97年做特首時只有兩個孫，𠵱家已經加到八個；佢弄孫之餘，話自己好「認真」咁做緊政協嘅工作，已經去咗10個省訪問㖭。
除咗老董，眾人媽打李麗娟都攞荷蘭水蓋，佢前晚先響台北同個女擺結婚酒，噚日搭早機返嚟受勳，辛苦但開心到暈；仲有舊年為世貿盡心盡力嘅21個公務員，包括統籌辦事處總監王榮珍。
唔少得嘅當然有槍擊事件嘅殉職警員曾國恒（家屬代領）、受傷警員冼家強，同埋不幸癱瘓嘅朱振國，朱太同囡囡噚日代表攞獎，囡囡仲話：「我覺得好榮幸，有個咁叻嘅爹哋。」
