星期日係FamilyDay，上晝全家歎完茶，下晝有咩搞作好？正當各位父母傷透腦筋嘅時候，睇過今日《蘋果》DVD推介，包你茅塞頓開！事關碟場新返咗隻闔家歡啱睇嘅《4條腿拯救隊》，有森美、黃子華配音之餘，仲具有教育意味，因為盒內附送DVD電腦光碟已有齊電影相關活動教材，最啱梗係一家大細齊齊睇、齊齊玩啦！
記者：陸俊雄
4條腿拯救浣熊
其實《4條腿拯救隊》講咩？起初，筆者睇完覺得中文戲名有點誤導觀眾，甚至想幫佢改過名做《4條腿為食兵團》之類！從表面上睇落，成套戲係圍繞4條腿（一群動物）發生，佢哋進入人類世界偷嘢食，跟住仲遇到人類追殺。後來諗深一層，其實套戲係想講，正直到不得了嘅烏龜，同好單純、輕易信人嘅松鼠及箭豬等動物，因其行為感動到浣熊改邪歸正，最後令到呢位「浪子」終於回頭。
睇碟學英文
《4條腿拯救隊》屬荷李活夢工場作品，故事正面想有暴力血腥都難。再細心睇佢DVD內嘅「特別收錄」，筆者直情想用「教材」呢兩個字來形容，做阿媽老竇嘅，真係唔買唔得。
事先講明，「特別收錄」入面全英語對白，雖然唔會再有黃子華、張達明同森美嘅聲音演繹，不過正係陪仔女睇戲學英文嘅好時機。當中有個認識動物世界嘅英語教室，主要介紹戲中動物性格，仲會見到真實動物片段，非常討人歡心。另外，喺DVD電腦光碟入面仲有14個可供列印嘅檔案，可以畀小朋友DIY製作書籤、月曆、信紙；仲有一啲需要你動腦筋嘅遊戲，例如英文猜字、串字遊戲，小朋友真係有排玩。
教細路珍惜大自然
之前提過，套戲主線係講拯救隊點令浣熊浪子回頭，從另一意義上睇，就係講呢群動物點樣保衞自己家園，感覺有啲似宮崎駿《百變狸貓》，講人類不斷發展，破壞大自然令小動物無處容身，不過表達上冇宮崎駿作品咁明顯。睇番《4條腿拯救隊》個英文原名叫做《OverTheHedge》，明指隔開動物與人類世界之間的籬笆。松鼠講咗句︰「見唔到盡頭。」跟着浣熊又話籬笆以外四周都係人類嘅房屋，擺明想諷刺人類破壞大自然啦！講講吓「籬笆」，忽然又想起多年前有套以「白澳政策」為主題嘅《孩子要回家》，唔知夢工場班創作人，係咪因為呢套片有感而發呢？總之，一套可以令大人同細路反思嘅好片難求，《4條腿拯救隊》絕對係呢類好電影。
6個必睇好笑位
別先入為主，以為劇情講一班動物偷食就一定好悶冇高潮位，其實全片好多幕都畀到觀眾驚喜。要數最深刻嘅，一定係4條腿為浣熊預備新屋嗰幕！事關當時係講4條腿唔知浣熊利用佢哋，仲封晒佢做偶像㖭！觀眾最好多啲留意創作人點用抵死諷刺手法，去演繹浣熊內疚嘅心情。另外，筆者仲精選全片6個必睇好笑位，包保你一家大細笑到碌地！
第一幕 萬刀穿心
套片一開首就講烏龜穿過籬笆，第一次進入到人類世界，仲差啲連命仔都冇，夠晒驚險百出！
第二幕 流晒口水
浣熊開薯片，對於4條腿嚟講，一股前所未有嘅香味喺袋入面散發出嚟，畫面表達得非常抵死！
第三幕 Sales上身
以為自己見識廣博嘅RJ，走入人類世界見到架私家車立刻Sales上身，猛向4條腿介紹。
第四幕 鋤Ｄ搵「銀」
人類就鍾意賭波買六合彩搵真銀，原來喺動物世界裏面，鋤D贏取對方手上食物先至最緊要！
第五幕 詐死鬆人
老鼠仔懶醒以為詐死就可以脫險，點知捉動物嘅專家早就睇穿佢條屎橋，一樣要束手就擒。
第六幕 遇見上帝
佢哋好似10日未食過嘢咁，打開雪櫃嗰陣即見一道曙光射出來，直頭好似遇到上帝咁緊要！
售價$128（級別：I）
查詢：年代電影（27873612）
