一位讀者來函，來自界限街某貿易公司。呢位讀者姓Y，細說Y太追索保險賠償的故事。
Y生話佢太太在今年年初發現左乳房硬化，到九龍私家醫院診斷，查唔出係乜事；再到深水埗某公立醫院檢查，發現係乳癌，於是開刀切除左乳房。事後向保險公司索取保險賠償，保險公司拒絕，理由係（一）事先未得公司批准施手術，（二）未有向認可醫生求診。跟單之保險經紀覺得於理不合，向公司上訴，駁回。
Y先生話自己不是省油的燈，向保險公司索償不成，就到小額錢債法庭控告，要求保險公司賠保險兼額外精神損失賠償二萬元。Y先生話唔諗住會贏，只係想保險公司緊張一番。開庭嘞，保險公司在庭上提出和解，願意賠償保險金，於是「無事退朝」！Y先生並不在意甚麼精神賠償，只係想出啖氣而已。
Y先生來函，係想話畀眾多讀者知道，以後如果有保險公司唔肯賠償保險金，一個快夾妥嘅方法就係入稟小額錢債法庭，唔使同保險經紀、保險公司糾纏，浪費時間。
一般人平時交保險費十幾二十年，從不（亦唔想）索取保險金，到咗真係有事，問保險公司賠，保險公司唔肯，確係不知如何申訴。Y先生話佢太太買咗十多年保險，估唔到第一次有事就碰上乳癌，十分唔好彩，點知保險公司賴皮，確係可怒也，先至上小額錢債法庭。呢個方法，唔知可唔可以廣泛應用，不過Y先生希望公諸於世，左丁山於是公開之，請大家研究吓，或者同法律界人士傾吓先。
本欄讀者確實係包羅萬有，Y先生係生意人，另一位讀者係讀書人，來函指出本欄於十月十二日講溫總理引辛棄疾詞，內有提及最後兩句「江晚正愁餘，山深聞鷓鴣」，實乃「正愁余」之誤。呢位讀者陳先生係啱嘅，原文係「正愁余」，刊出後竟變成「正愁餘」，變成意思不明，合該更正。