香港首富李嘉誠日前接受《朝鮮日報》訪問，進一步提到「退休」問題。視富貴如浮雲嘅李超人話：「我身體健康沒有任何問題，難道年齡能成問題？退休，想都沒想過。」
《朝鮮日報》日前獨家訪問長實主席李嘉誠，噚日刊出。記者問佢有冇諗過退休，李超人話冇打算退休，不過就有個逐步淡出嘅計劃：「從2008年開始，也就是後年開始，要把精力多放在李嘉誠基金會的活動上。打算每月抽三日全天做基金會的工作，然後每天抽出八個小時左右參加基金會和慈善奉獻活動。」
根據李超人自己講，佢家陣已經每日花四粒鐘喺基金會嘅工作上：「我每天10個小時的工作時間中，六個小時在長江集團，其餘四小時全都投入到基金會。」然後李浮雲又再度顯示自己嘅富貴心得：「富的人很多，但貴的人不多。
我認為真正的富貴在於，將自己所賺到的錢回饋於社會的內心。有再多的財產，沒有志氣，那才是最窮的人。」係咁嘅話，八方即刻有個癡心妄想，港燈可唔可以加少啲價，賺少啲電費呢吓？