麗豐（1125）呢期仲喺0.33元半年低位打底，殘到飛起，買定等起飛。祖國房地產股生猛，龍頭唔使多講，就以曾經同麗豐股價差無幾嘅沿海（1124）為例，由今年頭三粒神，狂飆上1蚊水位，主打麗豐仲低企半年超殘位，走勢實情大落後。
又麗豐最新NAV0.67元，現價（0.33元）折讓過50%，集團揸住嘅土儲及投資物業，樓面高達1290萬平方呎，齋計佢每方呎升值一張紅衫魚嘅價錢，已經可以為麗豐增值超過10億銀。麗豐NAV秤盡啲，可以上到1蚊水位，折讓實情高達67%，吸引到痹。
再講，麗豐06年度中期（1月止）純利增長61%到6923萬銀，幾乎係由租金收入及物業銷售帶動，若果撇除重估收益，相信06年度純利繼續大有增長之餘，兼且實淨好多。麗豐中線翻一番到0.66元，NAV折讓仲有34%，價殘遲早起飛。
渝港0.118元收集
渝港（613）最新市值約莫10億銀，以渝港揸住阿仔確利達（1224）嘅應佔市值，高達9.8億銀，幾乎睇齊渝港市值，阿媽渝港又係殘到痹。又呢期確利達有意變身祖國房地產股，確利達受追捧，渝港又可以炒同氣連枝。
再講，渝港NAV0.25元，現價（0.121元）相對折讓近52%，加埋手頭淨現金高達2.7億銀，港股有乜依郁，渝港有一定避風能力。趁呢轉打底，吼住0.118元收集，短打博見0.14元，有魚有肉。
錢雋