(1)基金揀股嚴謹，亞洲開發銀行（下稱亞展）搵嘢入股更加嚴格。中國燃氣（384）要過3關才獲亞展首肯入股，成為亞展第1間直接投資本港上市公司。要釣大魚，賺夠1個開，中燃當然係首選。今周正選就係佢。
中燃市值41億元，在內地投資與分銷燃氣，看似平凡，同業且有新奧燃氣（2688）、百江燃氣（1083）與鄭州燃氣（8099）在港上市，能獨獲亞展垂青，絕對唔簡單，首先必須闖過以下3關：
獲垂青先過3關
第1關：須承擔社會責任，對國家發展有助，業務運作不能污染環境。
第2關：管理架構完善，治理有方。亞展交由歐洲評估公司，用1年半時間全方位調查考察，才作出定論。
第3關：財政健全兼有盈利能力。
中燃董事總經理劉明輝話過，亞展經嚴格審核滿意後才決定入股。由此可見，中燃的確係一間管理優良、盈利能力強勁兼可肩負重任上市公司，符合最基本揀股條件。根據入股形式，更可進一步證明，中燃足值100分。
亞展直接貸款5000萬美元畀中燃，又動用2400萬美元，認購中燃1.5億股新股，作價1.25元，佔擴大後發行股本4.88%。另外，出任牽頭銀行，提供7500萬美元商業銀行貸款。
亞展從未直接投資本港股市，在內地入股工商銀行與中國銀行內資股，所用金額上限都只係7500萬元，今回第1次投資中國天然氣下游分銷領域，足證亞展對中燃另眼相看，唔會係盲頭烏蠅亂碰亂撞。
大股東鑽石陣容
亞展係非牟利政策性銀行，成立目的在消除亞太區貧困，絕少直接投資，由66個股東組成，只限與政府或財金部門合作，參與基礎建設如公路、電廠與環境治理。中燃獲破例入股，當然仍有其他因素。單睇大股東名單，保證令你心動。
中燃最大股東係中國國務院直屬海峽金融，持股11.06%。其餘大股東仲有中石化（386）、印度政府控制GAIL（India）石油公司與亞曼政府旗下Oman石油公司，加埋亞展，簡直係鑽石陣容，贏晒同業，未計PE與P/B因素，已值得以身（家）相許，揸1年，有機會賺1個開，明年春季或首季，先見2元。
高彰坡