愛情真係奇怪，陳冠希（Edison）以前拍親拖都唔肯公開，𠵱家同楊受成姪女、楊超成愛女Vincy拍拖，唔單止肯公開承認，仲唱埋出嚟，認真甜到漏。
歎昔日愚蠢
組合農夫最近推出咗新碟《音樂大亨》，搵嚟好多歌星合作，關仁早排聽完首《愛似林一峰》，內容講愛情嘅，覺得好寫實，點知原來仲有首《愛似陳冠希》，最近先派上電台，首歌係由陳冠希、C-Kwan同6Wing填詞，各人仲rap番自己填嘅部份，Edison就將自己近排嘅戀愛心聲做題材，大讚新女友Vincy講心唔講金。
Edison話以前自己好儍，啲女友成日要佢買名牌，唔係名牌唔好送，唔係Benz唔肯坐，仲享受俾記者跟蹤，睇嚟佢對以前女友好不滿，唔知係講緊陳文媛、鄧麗欣、周麗淇、張栢芝定係2R嘅Rosanne呢？但𠵱家唔同晒，Vincy唔係藝人，屋企又有錢，梗係唔使佢送貴嘢啦，亦唔使宣傳博知名度，所以「唔要銀紙唔要Dior，淨係想成日攬住我」。睇嚟Edison真係好陶醉呢段情入面喎！
