向來上網都只係去足球網站搵料，好少睇新聞組，自己亦唔多識用，直至世界盃嗰排，有朋友話我知有幾個新聞組會講球彩台嘅嘢，於是上去睇睇，又幾搞笑喎。
久而久之，我已養成上呢啲新聞組嘅習慣，一來可以睇吓網友對我哋嘅意見，二來又可以睇吓其他人有咩賭波猛料。
盤神受人追捧
至於我哋嘅心水，「XX好準喎，XX就燈啲喇……」好似打電話嚟嘅球迷咁，有讚亦有人彈啦！不過一直以來，總發覺「盤神」好受網友歡迎，每晚都梗有個標題問佢喺球彩台畀咗心水未。
真羨慕師傅，佢做節目又唔使見樣，淨係出把聲同埋畀心水，就已經有人追捧。亦因為無人見過佢，班網友就好好奇究竟佢係邊個。講真，佢一旦畀人知佢係點樣，一定唔得掂；唔係因為佢太靚仔，而係佢出街實會畀人圍住問心水。
有盤神呢個神秘人幾好，起碼人人想知佢係邊位就追住睇，佢真係我哋球彩台不可或缺嘅元素嚟㗎！
WENDY
由歐國盃EuroBabes，變身球彩台受歡迎主持。