郭錦恩的曾祖父郭泉是上海四大百貨業永安的創辦人之一，出身名門的她卻愛上電影夢工場。曾經對電影滿腔熱誠的她婚後雖以家庭為重，專心照顧丈夫和三子女，平安過渡七年之癢，但她一直沒有放棄心中的電影夢，希望可以再執導演筒，以搞笑角度拍攝以女性為題材的電影，大膽地談性說愛。 撰文：顏英儀
郭錦恩的曾祖父郭泉是上海四大百貨業永安的創辦人之一，她是郭氏家族第三代後人，算是名人之後，不過自小與家人移居美國後，與親戚沒有甚麼來往，也甚少提及自己的家庭背景。早前她的女兒Red當上小模特兒在尖沙嘴行騷，郭錦恩說：「我喺香港出世，小四時跟父母移民美國，所以好少同親戚聯絡。爸爸喺美國經營旅行社，我個女今次行騷，令我想起我大約6歲時曾經為永安百貨行騷，只記得當時同表哥玩得好開心。」
妙法止七年之癢
99年郭錦恩與美籍丈夫Richard共諧連理，二人育有三子女，大兒子Wolf今年六歲，二女Red三歲和幼子Kiva歲半。擁有完美家庭的她上月9日度過與夫婿的結婚七周年紀念，一般人認為婚姻到了第七年可能會因平淡的生活規律而感到乏味，因此有七年之癢的說法，但郭錦恩說：「我年年都唔記得結婚周年，今年結婚七周年都冇特別慶祝，但我覺得自己好幸福，可以同老公嘅關係保持得好好，冇所謂七年之癢。通常女人會投訴男人唔記得周年紀念，反而我成日唔記得，99年9月9日結婚雖然好易記，可惜平日照顧小朋友已經忙到𠱁𠱁轉，要keep住美好婚姻，雙方面都一定要出力，我老公成日要公幹，見面時間唔多，不過定期要有二人世界。」
着重內容唔低俗
婚後郭錦恩一直以家庭為重，相夫教子，視家庭為第一位的她原來一直沒有放棄其電影夢，談到電影她便滔滔不絕，心裏仍有一團火在燃燒，希望可以再做導演，她說：「我從來冇放棄我嘅電影夢，湊三個小朋友要好多時間同心血。喺我腦入面不停有idea，希望可以用搞笑嘅角度拍女性題材電影，因為接近自己嘅世界，例如係女性嘅問題、男女關係、性、女人病等話題，繼續拍攝以女性為題材嘅商業電影，可以用娛樂角度去拍，用輕鬆手法談性說愛，不過要有內容同唔低俗。我兩年前投資嘅舞台劇都係自己鍾意做創作先做，完全冇考慮要賺錢，做創作一定要有心，否則就做唔到自己想要嘅嘢。最近有人搵我演舞台劇，題材都好大膽，我最鍾意接受挑戰。」
培養小童自信心
除了教導自己的子女，郭錦恩現於一間學校教小朋友英語，她說：「我曾經辦過學校，不過已經冇做。𠵱家我喺一間學校以活動教學形式教小朋友英語，小朋友又唱又跳，其實主要係參考我喺美國讀TheatreArts嘅概念，以活潑手法令小朋友可以有自信啲表達自己，呢樣係香港小朋友缺乏嘅。另外下月底將推出我製作嘅雙語教材《CultureCubs》，我全家出動一齊演出。」
攝影：ChanShunChing
服裝提供：LePetitPois（Red）
