特區政府推出嘅優秀人才入境計劃，目的係吸引優質專才嚟香港定居，音樂界計郎朗之後，另一蜚聲國際嘅鋼琴家李雲廸，噚晚承認已經入紙申請優才計劃，但未知幾時批。問佢鍾意香港啲乜？佢話：「我家住深圳，去外國經常喺香港經過、停留，香港就似另一個家。」
一如其他國際名人，李雲廸身懷多國護照，「我之前喺德國讀書，只係攞德國簽證，𠵱家我已經有美國綠卡，可以長時間留喺紐約。」佢承認，就算批咗香港嘅入境證，都未必會長期定居香港，始終係留喺紐約時間會多一啲；多拿一個地方嘅居留權，主要係方便推廣同做音樂方面嘅交流。佢話雖然對香港街道唔多熟，但會考慮揀交通便利嘅地區置業，更加唔擔心狗仔隊。