建築署新書《後九七．香港公共建築》噚日出籠，本身係建築師嘅立法會議員劉秀成到賀壯行色。劉秀成話佢有份設計嘅建築物都有同一理念，就係要有空間，通風同有天井；又話呢個係配合香港天氣嘅設計，好似近期剛完工、位於九龍灣嘅香港大學副學士學院，雖然係一座高樓，但係劉秀成就設計咗好多空中花園，中間通風地方好大，就算身處其中，都好似身在外面咁。
佢其他傑作仲包括香港、法國及澳洲國際學校，以及前排竣工嘅西島中學，佢話其實香港啲樓密就密啲，但始終係唔錯嘅城市，既方便又好有特色；反而中國好多城市照抄香港就錯嘞，因為每個城市都應該有自己特色。佢話，啲建築物同啲行人路如果起得有多啲空間，多啲綠意，港人嘅戾氣同埋怨聲應該都會少好多噃。連建築都同和諧有關，八方要向佢寫個服字。