一年一度的萬聖節又到，扮鬼嚇人係例牌活動。不過當你喺度諗住點扮得最出位最嚇人時，其實香港四圍都搞緊各式嘅萬聖節活動，博你去玩。無他，都係想大家癲番晚啫。但咁多度，去邊好？𠵱家醒你一日撞鬼扮鬼狂歡攻略，同你由朝撞「鬼」撞到黑！你準備好未先？
記者：蘇振鵬
攝影：譚盈傑、陳盛臣
模特兒：Bianca、Va
11:00AM會見有型死神流克
趁着人氣電影《死亡筆記》後篇就快上映，朗豪坊趁勢搞咗個《死亡筆記》主題展館，不但有張高七呎的蘋果櫈任你坐，還有一比一高八呎嘅死神流克棟係度任你摸。模特兒Bianca好出奇咁話：「喂，佢完全唔似萬聖節啲鬼嘅！」Va答：「人哋話晒都係死神喎，仲Gel晒Punk頭着晒皮褲，咁型嘅死神你又見過未先？」梗係未啦，應該冇人見過死神嘅，但計我話間中搞吓新意思，參考佢個造型今晚去Wet都唔錯噃！
順帶一提，𠵱家去朗豪坊Shopping，仲有機會得到《死亡筆記》各款禮品。此外，只要你喺呢個商場Shopping夠$300嘅話，就有機會食到Halloween小食玫瑰冰糖蘋果，但留意，只得聽日30號一日咋！
《死亡筆記：最後的名字》獨家展館
朗豪坊（21482160）
日期：即日至11月5日
時間：11am-11pm
地點：旺角朗豪坊4樓通天廣場
備註：由今日至11月5日，於朗豪坊消費滿HK$300（最多可累積兩張即日機印發票計），即有機會贏取ANA雙人來回日本東京機票及多款《死亡筆記：最後的名字》獨家限量版紀念品及主角親筆簽名珍藏版紀念品。
1:00PM嘩鬼飛髮舖造型Rehearsal
睇完死神流克嘅造型之後，梗係要開始熱身，先入間傳統鬼屋壯壯膽。喺朗豪坊附近嘅新世紀廣場就搞咗間「嘩鬼飛髮舖」，入面除咗有驚嚇Salon場景布置，仲有嘩鬼失驚無神走出嚟嚇大家。最正係喺最後一間房入面，有齊各種萬聖節造型衫、假髮等，仲貼心地整咗幾塊化妝鏡，Bianca同Va都話：「可以做定Rehearsal，試定心水造型先走呀！」
嘩鬼飛髮舖
旺角新世紀廣場（23970790）
日期：即日起至31日
時間：12:00nn-10:00pm
地點：新世紀廣場1樓
備註：30號及31號均有特別節目。30號的7:30pm-8:30pm有「教你做隻鬼」、8pm-10pm有「嘩鬼TrickorTreat」。31號的6pm-9pm，有嘩鬼車「飛髮」出巡旺角、8pm-10pm有Halloween暢飲大派對。
3:00PM灣仔玩具街買飾物裝身
好了，玩過鬼屋，係時候裝身準備今晚出動！要買萬聖節道具，非灣仔太原街莫屬。太原街又名玩具街，出晒名買玩具，去到萬聖節都唔執輸。不論大舖或小攤檔，都掛滿各式各樣嘅萬聖節道具，由正經到騎呢，由頭飾到衫到玩具乜都齊，Bianca同Va仲試到唔捨得走呢。入去打個白鴿轉，要幾靚有幾靚，要核突有幾核突！
6:00PM嘩鬼滙聚蘇豪東
將自己變成靚鬼後，入夜就出動！每逢呢個時間，蘭桂坊都會超多「鬼」逼埋一齊，行都行唔到。你變到幾靚幾核突都好，都只可以同你側邊嗰位一齊逼嘅仁兄Say個Hi，鬼咁無癮！其實喺港島區都有好多萬聖節熱點，好似位於西灣河鯉景灣的蘇豪東就係其中之一。呢度酒吧林立，鄰近海濱，有Mood到痹。今年主辦單位更首次將一間空置餐廳變成鬼屋，俾大家免費嚇餐飽。咪睇小佢規模細，佢哋一樣有主題有故事，仲有埋導遊，帶領大家解開一次殺人案件中的謎團，屆時蘇豪東一帶仲有一大班嘩鬼巡遊一齊癲，氣氛唔會差得過蘭桂坊呢！
《萬聖神秘之夜》
日期：10月29及31日 時間：7:30pm-10:30pm
地點：西灣河鯉景灣蘇豪東（28801883）
交通：西灣河地鐵站A出口行10分鐘
備註：於活動期間的6pm-11pm，有免費巴士由銅鑼灣百德新街接送往返蘇豪東，每15至20分鐘一班。10月29日於蘇豪東任何餐廳用信用卡消費滿$300，憑發票可即場自製新鮮南瓜「鬼火蹤蹤」燈籠一個。10月31日於蘇豪東任何餐廳用信用卡消費滿$300，憑發票即可免費換領「嘩鬼購物袋」一個或參加「劃鬼你」化妝一次。