傅穎廢寢忘餐
「《24》呢齣劇真係好吸引，而且成個古仔都好刺激，每集代表一個鐘，會講唔同嘅嘢，等觀眾要追落去，每一季我都睇到廢寢忘餐，因為好想知道結局係點。𠵱家《24》已經拍到第五季，雖然比起第一季已經失色咗唔少，但係都仍然有一定嘅吸引力。」
最喜歡劇集：《24》
鄭融追看潮流
「《凹/凸容醫》劇情好豐富同緊湊，啲主角又靚仔，如果你冇睇一集，就會唔知下一集講乜，所以一定要每集都追。雖然入邊有好多整容鏡頭，但做得好似，除此之外，睇得出美術花咗好多心思，無論演員去蒲嘅地方或者着嘅衫，都係好新潮嘅嘢。」
最喜歡劇集：《凹/凸容醫》
歐倩怡學煮韓菜
「我最鍾意睇嘅外購劇係《大長今》，因為我好鍾意有關煮嘢食嘅節目，而《大長今》全齣劇都係有關煮食，我可以從中知道韓國人嘅煮食習慣。劇中我最鍾意嘅角色唔係長今，反而係長今個朋友、朴恩惠飾演嘅連生，因為覺得佢怕怕醜醜，好得意。」
最喜歡劇集：《大長今》
李彩華明爭暗鬥
「呢套《戲說慈禧》故事由慈禧嘅少女時代講起，最初係佢俾人欺負，講到佢好慘，之後逐步講佢性格點樣轉變，點樣喺宮中明爭暗鬥，劇情有啲似《金枝慾孽》，好緊湊之餘，每一集都有高潮位，套劇好耐之前喺黃昏六點時段播，當時自己日日追睇。」
最喜歡劇集：《戲說慈禧》
Race（2R）回味初戀
「我覺得阿Rain個樣好可愛，家姐（Rosanne）都好鍾意佢，佢一睇到靚仔就好開心，阿Rain喺《浪漫滿屋》裏面做嘅嘢好儍，雖然佢成日同女主角宋慧喬嗌交，但係兩個人表現好甜蜜，好有少女拍拖嘅甜蜜感覺，女仔睇到投入時，個心都會有啲噗噗跳！」
最喜歡劇集：《浪漫滿屋》
李逸朗惡補英語
「我記得嗰時我成日追《仁心仁術》，當時仲讀緊書，我追劇都係為咗可以學好英文，因為劇中除咗醫學用語之外，亦都有好多日常用語。不過我嗰時只係睇咗第一季，冇追睇落去。我最鍾意嘅角色係佐治古尼，因為佢又靚仔又好戲，真係好搶眼。」
最喜歡劇集：《仁心仁術》
側田狂煲難停
「我睇咗《逃》第一季，覺得題材好得意，一睇就簡直停唔到，我仲係一口氣連煲10幾個鐘。但係我就未必會追第二季，因為啲美國劇有時會令我好失望，為咗賺錢而將個故事係咁拖落去，有時第一季成功咗，唔代表第二季都好睇，自己好想喺第一季就知道結局。」
最喜歡劇集：《逃》
梁漢文睇完心噏
「木村拓哉喺日劇《美麗人生》裏面做靚仔髮型師，常盤貴子就係女主角，整個配搭已經吸引，雖然我冇乜追劇癮，但係呢套劇個故事真係好感人，睇完雖然令我個心有啲噏，但係我就不斷追嚟睇，整套劇嘅節奏都係牽住我走，編劇好犀利！」
最喜歡劇集：《美麗人生》
採訪：駱華齡、張俊銘
