男女間離合本來好平常，但當事人婆婆媽媽嘅態度真係會令人扯火！好似龐維仁咁，自從舊愛李嘉欣同許晉亨拍拖後，佢就同番分居老婆黃美儀一齊，仲拍住拖幫阿媽影相㖭。
不過前晚龐維仁同黃美儀、哥哥龐維新兩公婆，四個人一齊喺中環出席BelvedereVodka活動，同場仲有韓君婷同陳嘉容等人。龐維仁入場見到記者即刻左閃右避，唔肯同黃美儀企埋影相，逗留幾分鐘後就索性走人。龐家四個人企喺雪廠街等車，記者叫龐維仁同老婆合照，佢竟然丟低對方，走過對面馬路企，認真冇風度！黃美儀自然好尷尬，無奈咁話：「我影相冇所謂，你哋叫到龐生嚟咪影囉。」最後兩公婆上咗七人車，但係分前後排坐。既然佢哋咁怕影到一齊，好心就唔好一齊出嚟啦！
韓君婷洩春光
反而同場嘅韓君婷就好風騷，着住短裙嘅佢唔理走光，將對玉腿擱上梳化。問佢係咪飲醉就鍾意亂攬人？佢話：「我好少high，飲醉都會自律同小心翼翼。」唔通上次佢攬滴水男時係未醉？
採訪：吳天慧
攝影：葉君海
