睇完里安納度狄卡比奧（LeonardoDiCaprio）同麥廸文（MattDamon）扮梁朝偉同劉德華，有冇興趣睇埋奇雲高士拿（KevinCostner）同艾斯頓古查（AshtonKutcher）扮鄭伊健同林保怡？佢哋齣新戲《驚濤搶救》（TheGuardian）好似TVB劇集《隨時候命》一樣，都係環繞飛行服務隊，不過論緊張刺激程度，《驚》片應該高幾班。 撰文︰戶川惇
香港嘅飛行服務隊，喺美國叫「美國海岸特種拯救部隊」，隸屬軍方，拯救員均經過嚴格挑選，事前要接受18星期地獄式訓練，當中包括：從50呎高空飛機凌空跳入水面，衝擊力同撞向石屎牆無異；於黑暗冰海進行拯救，60%時間身體處於低溫狀況；隨時喺驚濤巨災中獨力拯救多達20名情緒失控海難者。因此能夠入選者根本同超人差唔多，好似伊健咁平時只係打開羽毛球，應該唔會有機會入伍。
天才泳手性格反叛
《驚》片故事就係環繞呢個拯救隊，講教官BenRandall（奇雲高士拿飾演）於一次行動中失誤累死全部隊友，自此專心訓練精英。一次佢發現學員JakeFischer（艾斯頓古查飾）係天才泳手，但性格反叛不羈，於是Randall決意以嚴格訓練令Jake成材。後來佢兩個要赴阿拉斯加執行拯救任務，身陷位於北極圈內嘅冰海「白令海」，被迫要在剎那間作出最準確嘅判斷，先至可以救人自救。
巨型造浪機配CG
雖然呢類魔鬼教練教化反叛學員嘅橋段，大家喺《新紮師兄》同《學警雄心》已經睇到識背，但《驚》片嘅賣點卻係電視唔可能睇到嘅震撼刺激嘅動作場面。
為營造拯救行動嘅凶險實況，影片不惜斥巨資建造全世界最巨型嘅超級造浪機，再結合最先進CG及真人特技，重現勁過香港十號風球嘅滔天巨浪。影片亦得到海岸特種拯救部隊全力支持，除借出多架救援直升機、C-130運輸機等去到白令海實景拍攝外，更為演員提供體能訓練。
話說艾斯頓拍完齣戲後，足足增加咗15磅純肌肉，結果搞到晚晚俾老婆狄美摩亞（DemiMoore）捉住。