萬聖節節目：鬼節變身狂魔專食人頭

老實講，香港人鍾意萬聖節都係想同班Friend聚一聚癲番晚，要數必做嘅節目，食餐飽飯一定走唔甩，想應節一點，可由食物造型方面着手，話晒萬聖節喎，梗係唔核突唔驚嚇唔食啦！我哋就做個街訪，等啲街坊揀出最恐怖嘅食物作為參考，結果係個個都鍾意食人個頭，原來大家身邊有唔少食頭狂魔！
記者：黃若茵
攝影：何家亮、周旭文
模特兒：Katie
化妝：Debbie

驚嚇行先食味亦講究

美麗華酒店推出一系列萬聖節美食，當中甜品同埋惡魔特飲最驚嚇！甜品師傅Henry話：「以往萬聖節都會創作唔同款式嘅甜品，今年雖然無乜特別主題，不過都係全新造型，而且比以往更驚嚇。」驚嚇同時，Henry都好認真，好似仿血漿嘅血色液體，唔係一般士多啤梨汁，而係加入紅莓汁令顏色更鮮紅。當中一個白面骷髏頭人人都話核突，但怕唔怕嚇到客人唔敢食先？「咁先應節嘛，況且我做每一碟恐怖造型甜品，上面所有配料都食得落肚，而且一定要好食，呢樣嘢我好堅持㗎！」甜品於酒店TheAtrium內嘅燕窩自助晚餐時段提供。另外酒吧eyes嘅調酒師亦創製4款詭異特飲，食完自助餐記得Keep住張單，因為憑單去eyes飲嘢會有8折優惠！

白面骷髏頭

整個骷髏頭用白朱古力慕絲做，因為師傅加多咗魚膠粉，所以唔易變型。口感則有點似棉花糖，唔會太甜，果然睇得又食得。

木乃伊之墓

Henry話：「棺材板最難做，砌埋幾塊朱古力個位要好準確。」棺材造型頗神似，裏面裝滿朱古力漿，嗜甜必定狂食。木乃伊身體係杏仁糕，再以糖霜做成白布形狀包住，比白面骷髏頭較甜。

萬聖節南瓜布甸

幾款甜品之中以呢款最趣致，白色鬼裏面係柱形芝士蛋糕，托起用糖霜做嘅白布。南瓜布甸就好正常，無玩嘢！不過旁邊一隻黑麻麻，用朱古力做嘅老鼠都令人毛骨悚然㗎！

恐怖食攻略

TheAtrium（23155199）
地址：尖沙嘴彌敦道118至130號美麗華酒店地下
供應日期：即日至10月31日
供應時段：燕窩自助晚餐（6:30pm-9:30pm）
自助餐價錢：成人$368、小童及長者$220
有着數：大堂設有大型照相板供客人拍照；另設懾人服裝大獎，勝出者有機會免費享用自助晚餐

eyes（23155888）
地址：尖沙嘴彌敦道118至130號美麗華酒店地下
供應日期：即日至10月31日
供應時段：5:00pm-1:00am
有着數：現場提供免費化妝服務，9:30pm後入座可以優惠價享用任飲套餐（10月29日及30日晚任飲價為$138、10月31日晚任飲價為$168）

鮮紅血菌汁　賣相逼真

走到Marco's門外已感到強烈萬聖節氣氛，擺滿十多個巨型南瓜，上面仲有一隻隻惡形惡相嘅青蛙。原來今年餐廳以「青蛙浴血千斤南瓜」作主題布置，雖然食物方面唔係相同主題，不過一樣夠核突嚇人，貌似蜘蛛絲、蟲仔、血漿等食物裝飾，見到都心寒。大廚亦好有心機，血紅色醬汁唔用甚麼士多啤梨、紅莓等，而揀選中國武夷山血菌混成，令醬汁格外鮮紅，更似鮮血！即日起至31日推出萬聖節套餐，有餐湯、頭盤、主菜及甜品，共有5款主菜供選擇，價錢則按揀選嘅主菜而定，由$138至$228。

比死更難受$198

原隻龍蝦開邊，拆肉加入茄汁及雜菌煮過後，再釀回蝦殼中，做法如此骨肉分離，所以改咗呢個名。上面灑滿一條條炸過嘅麵條，好似蛔蟲咁好核突呀！

免治人肉批

當然唔會係人肉啦！其實係法國鵝肝，壓到好似免治牛肉咁，再加入洋葱、香草拌勻，搽喺多士上食，香脆又夠濃味。

有你無我

以黑白朱古力做成眼球，裏面釀入南瓜慕絲，做得好仔細，連眼球血絲都畫到足。墊底醬汁係番茄加士多啤梨，甜中帶酸。

■既然玩「青蛙浴血千斤南瓜」呢個主題，餐廳內梗係隨處可見南瓜啦！

■恐怖面具都掛咗唔少，抬高頭梗有一兩個喺你附近！

恐怖食攻略

Marco's（23752352）
地址：佐敦吳松街169至189號聖地牙哥酒店地下
供應日期：即日至10月31日
供應時段：6:00pm-1:00am
有着數：每位入場人客可獲贈「恐怖青蛙」一隻；設有鬼臉化妝服務，每位$50

可愛造型　啱一家大細

MADISON'S今年以小朋友做主角，推出為食小鬼派對Brunch套餐，大廚Ringo話：「萬聖節希望一家大細都啱玩，所以食物有應節造型之餘，亦會可愛啲。」今次嘅Brunch甜品前菜都係任食，連每位客人都可揀選一款主菜，成人餐牌中嘅6選1主菜就普通啲，無話特別應節，但小朋友食嘅4選1主菜就有特別造型，想身邊小鬼們We嘩鬼叫，不妨帶佢哋去食個Brunch啦！

血肉橫飛

將龍脷柳切成手指般不同長短，加入雞蛋及麵包糠炸，非常香口，畀小朋友過口癮啱晒！另用薯茸模仿手掌位置，放上木魚絲及紫菜絲，好似手掌甩緊皮，嚇死人！