今日登場各支西甲聯球隊，為人熟悉焦點分子，只有西維爾及馬德里體育會。前者要客場鬥韌力十足嘅切爾達；馬體會主場迎戰對手，亦係今季實力分子之一嘅薩拉戈薩，令到今日全部7場秩序，最熱門單Ｗ落喺有主場之利，但無近況支持嘅奧沙辛拿身上。想講嘅係實在無乜值得重心出擊嘅鋼Ｗ可選，「讓球」及「大細」成為今日精選項目。
主隊貝廸斯上周有主力前鋒拿費爾蘇比斯停賽，今日輪到另一主力攻擊球員路爾斯伊度停賽，今季主場表現亦乏說服力；對手馬略卡迄今表現四平八穩，對住中游及下游球隊，贏唔到都唔使輸，先睇呢場「讓球」下盤。
皇家蘇斯達剛換帥，按例首戰可有不過不失表現；新帥路天拿新官上任，亦理應先執執條防線。對手維拉利爾今季略嫌攻力欠銳，亦唔止一次出現同對手踢成0:0戰果。呢場可博皇蘇「止跌」開個和局，0:0及1:1機會高，1注「細」就唔使煩諗買邊瓣啦！文：華度