傳說中以「龍、虎、鳳」煲湯好補身，真的用貓來煲的湯你喝過未？少爺威威在香港討論區留言，聲稱其母親的朋友愛在垃圾站「搵食」，竟然用棍扑死貓隻煲湯！更令人心寒的是，貓湯熬好後「仲要派街坊，好在我知道用啲咁嘢嚟煲，冇飲到啫！」
可愛的貓兒成為煲湯材料，惹起網民公憤。荔枝玉露質疑為何要用貓補身，「若然純為補身，點解唔去街市買隻雞？」tonycf稱，「老實講，咁做同食人有乜嘢分別？正禽獸！」coolguy120279認為要以其人之道還治其人之身對付這些貓殺手，「畀我就會搵次攞住碌棍，兜頭扑落你阿媽個朋友度。」
要求公開屠貓地點
也有人認為做出這些傷天害理的事的人遲早有報應，因為在垃圾站出沒的野貓可能染有滿身病毒細菌，吃下這些病貓可能染上疫症。光1234稱殺貓好過份，「佢唔知隻貓有咩病，攞嚟煲湯飲到佢病都唔知咩事，害死佢同啲街坊呀。」網民要求少爺威威公開屠貓地點，報警把變態貓殺手繩之於法，否則任人虐畜只會令香港淪為「冇王法」之地。根據《貓狗規例》，香港禁止屠宰狗隻或貓隻作食物，違例者最高可被處罰款5,000元及監禁6個月。