西營盤「英記火鍋海鮮酒家」早就響朵，揸Fit人係英姐就街知巷聞，原來餐廳本身唔係叫「英記」，英姐話：「以前叫做『強興』，後來因為我經常喺樓面幫手，個個客人都記得我，於是咪改名做『英記』囉！」講到呢度，英姐老公阿誠忍唔住插嘴：「啲客人想嚟食嘢時，只會諗住去阿英嗰度，而唔係諗到去『強興』㗎！」原來英姐畀客人如此深刻印象，難怪佢未由父母接手餐廳前，已改用佢個名啦！
餐廳由50多年前喺威利麻街大牌檔開始，至92年英姐正式接手，：「最初我哋係做潮州菜，後來唔知係咪因為天氣凍，喺70年代竟然變咗做打邊爐，當年唔興打邊爐，最多都係一次過放晒啲餸落個鍋度，唔會一碟碟餸分開上，當年我哋可以話係第一間咁做。」開創先河自然吸引，不過海鮮夠新鮮好重要，「因為西營盤出面就係海，每朝攞番嚟嘅海鮮零舍新鮮嘛！」咁多年嚟，經營方式已改變好多，「以前家庭式經營，屋企人一齊做，有人情味啲。𠵱家請夥計做開支較大！」眼見未夠6點客人已嚟到霸位，想食火鍋就要早啲訂位喇！
記者：黃若茵
攝影：陳陶鈞
魚湯底$50
牛頸脊$98
呢個湯最受歡迎，係英姐阿媽每朝到街市揀魚，鮮魚湯配肉味重嘅牛頸脊味道一流，每日誠哥都會到屠房攞貨，保證新鮮。
雜菌湯底$128
誠哥話新推出嘅雜菌湯底比較健康，算係符合潮流。用咗羊肚菌、姬松茸、黃牛肝同野生香菇等。聽落唔錯，全部都係貴價菌類，個湯滾起，香濃撲鼻。
（上）蝦滑
（下）墨魚滑各$50
英姐話：「全部都係自己手打，客人order上碟前，再用力撻多幾下，食起嚟更彈牙。」我鍾意食墨魚滑，好香墨魚味，食得出真材實料。」
英記火鍋海鮮酒家（25488897）
地址：西營盤德輔道西103至109號樂基商業中心1至2樓