一向敢言的杜琪峯，對香港是愛之深責之切。論政，他怪自己選錯長毛梁國雄做立法會議員，批評長毛只是在立法會嬉戲，毫無建樹。論電視圈，他眼見娘家無綫電視管理班子出現問題，連總經理都跑去做《志雲飯局》，擔心娘家會沒落。 撰文：陳月媚
論影視：《志雲飯局》壞風氣
杜琪峯很重視培養新一代製作人和演員，過往有不少影星都是來自無綫電視，講起娘家無綫，阿杜欷歔道：「呢個電視台王國，以前影壇半數巨星、大導演都係無綫捧出嚟，好似周潤發、梁朝偉、劉德華、徐克、林嶺東、許鞍華同王家衞等，呢幾年就一個都冇，𠵱家TVB係唔爭氣，我覺得同管理嗰班人有好大關係，呢班人根本唔係當電視台係一個抱負，只係插科打諢，好似個總經理走去做《志雲飯局》，我真係覺得唔需要，佢係咪應該全心全意去搞好個台呢？如果再係咁落去，真係擔心TVB會沒落。」
自從無綫實行一騷制以價綁住藝員後，確實令不少藝員選擇向外闖，杜琪峯最樂於用無綫棄將，君不見張兆輝、林家棟、盧海鵬和譚炳文等綠葉在他的電影中如脫胎換骨嗎？除了幕前，念舊的他其實也請了很多無綫淘汰的幕後人員來拍戲，阿杜說：「好戲嘅人點解唔用呢？搵無綫以前啲武師開工想敍吓舊啫！」
鮮浪潮育人才
阿杜近年不遺餘力推廣香港藝術發展局主辦的鮮浪潮短片競賽，該比賽目的是發掘具潛質的電影創作人材，今年已是第二屆。他更親自邀請王晶、舒琪、甘國亮和陳慶嘉出任講師。
在未來數月，入圍參賽者將參加「大師班」接受指導，以及籌備參賽短片的攝製工作。阿杜解釋：「𠵱家香港電影圈好缺乏新血，我唔希望香港電影工業喺我哋呢一代後就湮沒，所以我搵政府撥錢搞鮮浪潮，鼓勵有志喺電影界發展嘅年輕一代從事電影創作。」
為王晶大平反
不過在大師班的課程中，卻有學生質疑王晶在影壇的地位，大膽向他發問：「你覺得自己係乜大師呢？」當日王晶不慍不火說：「通俗大師囉！」對此阿杜也替他平反：「王晶喺香港影壇累積有10億票房，呢個紀錄連我都未做到，佢對香港影壇係有一定貢獻，其實影壇有導演拍藝術片，一樣要有導演拍商業片，王晶有佢自己嘅一派，請佢嚟做講師，就係要佢同學生講吓拍商業片嘅竅門。」
阿杜又指在無綫做編導時，在創作和製作上遇到任何問題，一般是自己慢慢摸索，不像年輕一代有導師輔導，故此很羨慕他們：「後生呢一代製作人其實比我哋幸福得多，好似我公司嘅新進導演羅永昌同游乃海咁，拍完第一部戲就心理有事，個個都要我去心理輔導，到我有事，咁我又搵邊個做心理輔導？」
談大計：與阿倫狄龍合作
在香港大導演之中，杜琪峯可謂近年來最多產，剛拍完《放．逐》和《蝴蝶飛》後，現在又與韋家輝聯合執導《神探》，拍得如此急，只因明年要正式拍西片，邁向國際之路，因為出年阿杜已答應為法國老牌影星阿倫狄龍（AlainDelon）執導一部英雄片，他說：「阿倫狄龍係我偶像，佢搵我拍戲，真係好開心，雖然佢已年過70，但仲好弗，喺新戲入面，我依然會將佢塑造成英雄人物，部戲會喺香港開拍。」
金像獎缺透明度
阿杜近兩年很踴躍參加外國影展，但香港金像獎電影頒獎禮，他一直認為機制有問題，欠缺透明度，故此每年都以開工為由缺席，到了明年他執導的《放．逐》大有機會奪獎，究竟他會否出席呢？他微笑道：「我唔知到時係咪要開工，所以呢一刻答唔到你呢個問題喎！我覺得一個頒獎禮冇人彈係唔會進步，我唔係要同金像獎大會嗌交，只希望佢哋機制係能夠做到公平同公開。」
在杜琪峯的電影世界中，大部份是男性電影，不知在他眼中女人又是甚麼呢？他思索了一會笑道：「女人，難以想像同難以捉摸囉！總之就係一個難字。近年冇乜拍愛情戲，係因為冇乜feel，咁咪唔拍囉！」
論政治：盼望香港有普選
祖籍潮州的杜琪峯，父親原來是共產黨員，但當年因為遭執政的國民黨政府追捕始逃到香港，阿杜說：「阿爸做共產黨員時，因為內地仲係國民黨主政，喺當時局勢，阿爸就係游擊隊，成日俾國民軍追捕，後來佢逃難到香港落地生根，有咗自己嘅家庭。但當中共正式掌政後，佢哋有人搵我老爹返內地，但阿爸想安定，所以就選擇喺香港生活，雖然阿爸同共產黨有淵源，但我對共產黨或國民黨都冇乜特別感覺，不過我覺得近年中共係進步咗，唔似得以前咁封閉，至於國民黨喺台灣做咗在野黨之後，可能因為痛定思痛，處事係叻咗，對將來佢哋重掌政權，施政方面應該有進步。」
老董有心無力
對於香港的政治環境，阿杜好希望內地能給予香港有普選權利，真正體現一國兩制，但他相信在短時間內難以實現。不過他還是覺得中央政府一直想搞好香港，他說：「中央如果唔係想香港好，點會畀咁多國企嚟上市，鞏固香港金融市場，仲有自由㖭！」
以前在董建華當特首的時代，阿杜一直批評他無能，到曾蔭權上台，相比之下他對老董有新看法：「老董係有心，但冇辦法，不過有啲人冇心，但有辦法。」
對於時下的香港政黨，他搖搖頭說：「香港𠵱家嘅政黨，我覺得由一班律師組成嘅公民黨最似樣，將來歷史會記得佢哋。民主黨就已經褪色，𠵱家班領導班子完全唔夠智慧，見到李永達同何俊仁連講嘢都口窒窒，你點樣對佢哋有信心呢？不過我最錯係投咗長毛一票，當時我真係以為佢有為民請命嘅信念，原來佢成日着住哲古華拉（CheGuevara）件Ｔ恤只係一種粉飾，睇咗佢喺立法會咁耐，佢嘅表現真係令人好失望，佢簡直當自己係遊客多過政客，日日只不過係嚟玩，抬吓棺材，唔知搞邊科。」
攝影：林德雄
