行程緊湊的一天，喺流浪會練完波，茶餐都未叫，就由大坑東潛水過去灣仔，做咩呢？哦！因為香港足球評述員協會，喺上星期二晚搞咗個聚餐兼會員大會，約咗全港電視同埋電台嘅足球評述員，濟濟一堂商討協會約章；因為協會初成立，要召集會員一齊通過約章，否則，協會做事就冇規冇矩嘞!
平時足球評述員都各有各忙，喺錄影廠又要馬上埋位，難得可以聚首暢談！約章第5條通過嗰陣，已經係8點幾，仲有幾條要過，惟有士急馬行田，掃清枱上嘅花生，做足球快閃黨！
與同學踢波歡聚
飛車到海闊天空嘅港大何鴻燊運動場，因為約好咗班港大舊生，畢業年半都無一齊踢過波，所以不得不閃呢！
咦！學校又改建咗一個仿真草球場，仲加裝埋夜燈，咁班同學就唔使爭崩頭啦！踢完波先至到戲肉，去咗綠野尋找仙蹤，整杯黑夜彩虹再話當年，無得頂呀!
聚散無常，雖然每次聚會都來去匆匆，卻教人學懂珍惜相聚時光。
馮嘉奇
碩士球員讀萬卷書，親身歷盡各國足球風情。