數年前到印尼餐廳食飯，朋友A話：「呢度啲侍應質素唔錯喎！」朋友B話：「人哋係呢度老闆嚟㗎！」無錯，Hudson、Alex同Alfred三兄弟係老闆，但朋友A都無錯，因為佢哋亦係侍應。今年才32歲嘅大哥Hudson話：「力不到不為財，由細到大我哋都喺舖頭幫手，03年接手舖頭後更加乜都落手落腳做。」呢個時候Alfred搭嘴：「剛接手餐廳時，我哋得兩個樓面咋，通渠抹窗乜嘢都親力親為。」梗係啦，話晒舖頭係阿爸阿媽多年嘅心血，點會唔錫住呀！Hudson就話：「餐廳就等於我哋嘅屋企，細個做功課溫書，甚至過時過節都喺餐廳度過，就算年初一我哋都會開舖㗎！」
有過咁多童年回憶，怪不得03年餐廳差點做唔住嘅時候，三兄弟決定接手，「當時因為沙士生意好差，加上舖頭又舊，阿爸話想唔做，但我哋覺得好可惜，於是決定接手。」大哥Hudson同讀建築嘅二哥Alex將餐廳改頭換面，睇尖沙嘴店嘅裝修已非常摩登，原來傢俬擺設都由東南亞購入，令餐廳散發出有如度假般的風味。接手後餐廳唔只靚咗，管理方面更有系統，「我哋為餐廳加入電腦系統及較完善嘅人力資源管理，更能夠配合餐廳嘅擴展。過咗幾年，已見三兄弟努力嘅成果。除咗銅鑼灣總店，現已計劃下年於旺角開多間分店，阿爸阿媽嘅業務得以保留並擴展，真係全靠3位連打雜都做埋嘅好兄弟。記者:黃若茵
攝影:周旭文
燜牛脷$88
Hudson話：「傳統嘅燜牛脷係切薄片配凍白飯，我哋做厚切，用麵包配搭口感最好。而燜牛脷個汁就有甜豉汁、蒜茸同香茅，食落有點似和牛！」
海鮮拼盤$168
Alex話：「個餸嘅英文名係峇里島一個海灘名字，食海鮮好出名。我哋呢個拼盤有龍脷、蝦、魷魚，以甜豉汁、青檸汁等煎香。」確係惹味！
峇里燒魚沙嗲$68
Alfred話：「魚膠加葱、辣椒、檸檬葉同黃薑等，然後搓到圍住香茅枝去燒。」有魚蛋彈口之感，同時混雜由香茅枝發出的味道。
IR1968bar+restaurant（26191926） 地址：尖沙嘴天文台圍2至4號A
