Game事撻:扭六壬力抗PS3、Wii XB360軟硬王牌冧港機迷

Game事撻:扭六壬力抗PS3、Wii XB360軟硬王牌冧港機迷

臨近PS3同Wii推出,微軟出盡法寶力抗兩大新機氣勢,喺剛完結嘅「X06」試玩會度,就喺日本班到一堆即將推出的勁Game,供入場人士試玩,此外仲有全球首款無線軚盤及XB360專用耳筒,可算軟硬件兩路齊攻,扭六壬誓要盡搶機迷目光!
文:福田
攝影:陳偉強

一如過往幾年,X06依然針對傳媒朋友、零售與批發商同埋一般玩家三個唔同層面嚟舉行。香港微軟高層Chester更學足老頂Bill叔叔幾年前扮AustinPowers咁,着件太空衣上演一幕「八大行星」棟篤Show,意即踢走多咗出嚟嗰粒冥「藍」星!佢想表達啲乜?口痕友指藍即Blue也,明啩!
唔少機迷都被現場巨大投影示範嘅遊戲預告吸引,最令人失望係《高達》、《藍龍》均冇得試玩,齋播預告片,而《藍龍》則分別展示咗三個唔同部份,分別為開場、戰鬥同MiniGame,但略嫌場面揀選得差唔能夠突顯隻Game嘅威力。《藍龍》日文版12月7日見街,繁體中文版則要等到07年。

香港老頂棟篤Show
■為咗砌低冥「藍」星,微軟高層化身太空人上演一幕棟篤Show。

■配合Live嘅賽車遊戲始終係XB360強項。

■《NBA2K7》嘅受歡迎程度絕不下於《NBALive》系列。

$3,199套裝賣大包

同微軟合作無間嘅Toy2R,將會繼續幫XB360特製切合其主題嘅得意公仔XB360×LiveQee,以迎合由噚日開始一連十日嘅「XB360潮爆優惠套裝」全新計劃。只要喺指定商戶以$3,199購買呢個套裝,除咗會有主機、《DOA4》和無線手掣各一之外,仲會贈送兩位Qee公仔、精美面版、貼紙、同步充電器同兩張$100Coupon,而頭50位買家更有機會獲得「XB360配件工具箱」或者《DOA》大手掣,計吓條數真係抵到爛。

■特製Qee面版連精美公仔,只限優惠套裝顧客享有。

Soft
香港率先試玩暴力FPS

唔計齋得播片睇嘅《高達》同《藍龍》,其餘幾款勁Game均設現場試玩。《LostOdyssey》全場只得一部試玩機座,由戰鬥到指令選擇,唔少記者都被播片轉入即時戰鬥嘅超強性能深深吸引。最搶眼係香港率先開放畀人試玩嘅《GearofWar》,以第一身射擊(FPS)玩法為主,精緻3D畫面搭超暴力血腥玩法,見到怪物一槍將佢個頭打爆,真係睇同玩都咁過癮!
另一矚目作《DOAX2》,仍以沙灘排球為主要玩法,不過就加入水上電單車、2人沙灘競跑等,官方仲聲明今集加入更多泳衣,仲要係比上集「維納斯」更出位大膽,值得期待!隻Game同樣行貨,令人高興嘅應該係中文顯示,事關會場內試玩版經已做咗部份中文說明,玩起嚟親切感大增!

■一如以往,都係搵嚟西瓜波靚女幫手宣傳《DOAX2》。($299、11月22日發售)

《GearsofWar》
■可謂歷來最暴力FPS之一,全因近身搏鬥連電鋸都出埋,劈到成個畫面都係鮮血。

《DOAX2》
■背景大幅強化,比起上集嘅度假Feel確係更加強烈,大可操控比堅尼靚女周圍Hea。

《DOAX2》
■加入更多水上活動玩法,如Kasumi揸水上電單車呢段MiniGame,視覺效果一流。

《LostOdyssey》
■雖只得一部試玩機座,不過井上雄彥搭坂口博信,大把機迷爭玩!

《DOAX2》
■今集依然一開波就有九名角色俾你揀,暫未知有否隱藏靚女。

《DOAX2》
■對話框寫住Chinese,即係仲未做好呢句中文對白咁解。

《高達》預告作熱身

《GundamOperation:Troy》
■引入FPS軍人打仗玩法,乃高達遊戲史上首次,加上畫面超逼真,好多機迷等住買。

■平常作戰時操作兵仔,要周圍搶高達或渣古當坦克咁用,面對龐然巨物嘅MS,相當之搞笑。

■人射機或者機瞄人嘅玩法式式俱備,但最失敗係成個場景空洞不已,冇掩護鬥射有乜好玩?

Hard
加谷無線軚盤獨欠HDDVD

喺外地算係今年消費旺季主打武器之一嘅HDDVD高清影碟機,雖然有傳香港遲啲返貨,不過暫時未有確實登陸時間,至於微軟現時嘅目光就放咗喺兩款無線周邊身上,睇個款都係針對SONY嗰邊嘅弱點嚟砌。今次主力向外推介唔使駁線嘅大型軚盤,內置ForceFeedback唔在講,採用銀色賣相亦都幾討好,佢仲完全對應《PRG3》同《Forza2》㖭,而且為咗Showoff無線嘅優點,更即場播條寸爆嘅影片;兩條友仔抬住個軚盤嚟玩搞鬼到極,唔使驚玩玩吓啲電線打大交!至於無線耳機則強調傳話夠清晰,但在下覺得佢個Look似足時下流行嘅藍芽耳機,先至係真正吸引人之處。可惜廠方未有提及兩者嘅售價與推出日期,到底係想留一手「睇定食」抑或未同班Game舖斟掂數,咁就真係唔多清楚。

■無線軚盤手工唔差,但仲未知到底賣幾錢。

試玩作品反應佳

今次X06放咗約30部主機俾人試玩,有成接近20款遊戲,唔少機迷都玩得好開心,當然遊戲雜誌編輯着眼點就係連TGS都冇得玩嘅超大作《GearsofWar》,而鬼佬Game《NeedforSpeedCarbon》和《Crackdown》都有唔少人試,反而《DOAX2》同《LostPlanet》就反應一般,唔通大家已經喺日本玩到飽晒?

試《GearsofWar》

■阿包:「都幾難玩下,掌握唔到重點,要重新適應瞄準敵人嘅技巧。不過畫面真係靚到飛起。」

■電玩太郎:「望起嚟好流暢,畫面質素可取,各方面都做得好逼真,而且敵人AI幾強,唔係易上手之流。」

試《DOAX2》

炸彈馬騮:「上集確係靚咗背景又細緻,而且玩法又多咗花臣,觀賞效果一流。不過班女頭髮依然係一pat嘢。」

試《LostPlanet》

阿昌:「覺得佢幾正,玩咗一陣已經覺得操作幾暢順,爆炸效果勁掂,不過就唔及《DeadRising》咁引到人出機。」

試《NBA2K7》

Ricky:「不嬲都有玩《2K》系列,今次畫面都叫OK,啲動作好仔細,操作方面同過往差唔多,唔算難玩。」

試《LostOdyssey》

朱生:「非常期待,戰鬥方式好有主流RPG味道,似足《FF》咁正。但好想知男主角唔會死咁咪好易玩?」

對手攻勢:行貨PS3下周有定案

最新鮮熱辣消息,SCEH剛發出傳媒邀請,喺11月1日(下周三),舉行PS3發布會,正式公布香港行貨詳情。到底幾時有行貨?分到幾多貨?賣幾錢?有冇香港Server?欲知詳情,請留意下周《Game事撻》緊密報道!