澳門永利酒店開張差唔多兩個月，見到詹培忠豪食過後，我啲口水滴到滿地都係，梗係心癢癢想睇吓餐廳裝修有幾豪。今次終於有機會試勻永利軒、Okada同ilTeatro三間各有特色嘅餐廳。不過我最Buy都係中菜餐廳「永利軒」，一條用咗百萬港幣做嘅水晶龍，仲有夠晒刁鑽嘅獨家「永利茶」，呢餐認真食得夠刁又夠豪。你都想豪？訂位啦唔該！
記者：黃若茵
攝影：譚盈傑
百萬水晶龍夠豪氣
「永利澳門酒店」共有6個主要餐廳，今次嚴選3間最豪最爆場嘅。當中「永利軒」假日必定滿座，平日去食都要訂位。要數「永利軒」中最巴閉嘅，一定係大廳嗰條價值港幣一百萬嘅水晶龍。用咗9萬粒Swarovski水晶，坐喺條龍下面食嘢特別賞心悅目。公關Kartharine話：「用龍做裝飾，一來配合中菜，二來美國嗰邊嘅Wynn都有唔少龍嘅裝飾，算係配合番美國總公司。」除咗水晶龍，餐廳中每個角落都畀人豪華嘅感覺。大膽地以紅、金為主色，紅得有啲刺眼，但又不失高雅品味。「永利軒」內另設有9間貴賓房，每間均有私人洗手間，落地玻璃透進日光，格外舒服。
廚房人手來頭勁
環境夠豪之餘，食物都唔弱，「永利軒」總廚鄧師傅今年已61歲，曾於北京「王府」當大廚，晚年返到澳門再次當起總廚重任。「本來都半退休，但見呢度資源豐厚，老闆又畀我自行發揮，所以決定重新接受挑戰。」究竟資源有幾豐厚，睇吓鄧師傅請幾多人就知，「老闆成日問我夠唔夠人用，人手方面任我請，我哋個頭鑊以前喺半島做總廚，二鑊亦喺帝京做過總廚，唔小嘢㗎！𠵱家人手好充足，淨係燒味部已經有18個師傅！」
豪睇
豪飲
永利茶（茶芥每位澳門幣$10）
每位VIP客人坐低，第一時間送上呢款獨家永利茶，總廚鄧師傅話：「我哋希望做一種與眾不同嘅茶，所以搵茶商幫我哋混合不同茶葉做呢個永利茶，總共用咗5款茶葉左右，入口帶甘甜，不難辨認出玫瑰香味，但不至太濃烈而掩蓋茶味，極易入口！」
豪食
高湯天九翅 澳門幣$998
鄧師傅用自己嘅配方煮成上湯，有豬骨、火腿、老雞等。實不相瞞，碗翅係細碗，點解要成千蚊，睇吓條翅有幾粗咪知囉！比起平日食嘅海蜇還要粗呀，從未試過呀！
黑松露菌齋石榴 澳門幣$198
鄧師傅話：「靈感嚟自潮州菜嘅石榴雞球，我就改用雜菌更健康。皮係用蛋白加少少生粉做成，煎過後包餡蒸，上面放少少黑松露，食得更矜貴。」我最鍾意反而係塊蛋白皮，超爽，咬到嗦嗦聲！
紅燒鮑魚汁厚花膠扣鵝掌 澳門幣$468
鄧師傅話因為客人大部份都係中年以上，佢哋特別鍾意呢類較傳統嘅食物。望一望以為鵝掌旁邊係一件紅燒豆腐，竟然係花膠，厚得緊要。
豪食攻略
永利軒（853-9863688）
地址：澳門外港填海區仙德麗街永利澳門酒店地下
營業時間：11:30am-3:00pm、6:00pm-11:00pm
全店座位：213個
人均消費：澳門幣$250
最好賣：魚翅
$3,000隻長腳蟹
日本餐廳叫做「Okada」，中文即「岡田」，原來美國「永利」其中一個老闆係日本人岡田先生，因而以此命名。岡田開業以來，最受歡迎就係魚生，而且經常有雞泡魚、赤干魚等少有嘅魚生供應，而最豪嘅莫過於一隻阿拉斯加長腳蟹，一隻蟹要3千幾蚊先有得食，且每次只入兩、三隻，賣晒就無。
豪食攻略
Okada（853-9863668）
地址：澳門外港填海區仙德麗街永利澳門酒店地下
營業時間：5:30pm-12:30am
全店座位：128個
人均消費：澳門幣$600
最好賣：魚生
食意大利餐睇真人騷
意大利餐廳名為「ilTeatro」，即劇院之意。廚房為開放式設計，讓客人可欣賞廚師煮食。想更寫意，可到露台位置觀賞噴泉。而總廚Aldo對意大利餐製作認真，「我從來都唔鍾意Fusion，做意大利菜就要做最傳統最正宗嘅，所有食材都由意大利入口，咁先夠風味！」
黑松露菌汁澳洲和牛西冷（200克）澳門幣$450
Aldo話揀選澳洲和牛因為肉汁好Juicy，質地又夠腍，不過依然採用傳統煮法。
香滑朱古力條配橙干邑汁$70
最底層係糖，之後有層黑朱古力、朱古力餅亁碎、同埋慕絲，個汁就係呍呢拿汁。甜品勝在唔太甜，食晒都唔覺膩。
豪食攻略
ilTeatro（853-9863648）
地址：澳門外港填海區仙德麗街永利澳門酒店一樓（大堂有專用電梯直達）
營業時間：5:30pm-12:30am
全店座位：150個
人均消費：澳門幣$500
最好賣：炭燒龍蝦配煎鵝肝