踏入10月又係展覽業旺季，近日除咗喺灣仔有個燈飾展外，喺機場嘅博覽館亦同時有三個展覽舉行，都係首次喺香港舉辦嘅環保、傢俬同建材展。展覽業人士高興之餘，亦有個憂慮，貿發局助理總裁周啓良話，香港嘅三、四星級酒店供應量未能夠配合展覽商務旅客嘅需求，一踏入旺季酒店價格可以扯高五成，佢好希望發展商起多啲酒店，仲話𠵱家展覽業唔單止旺4月、10月，連1、3、8、11月都旺，酒店起得過。
佢又介紹正舉行嘅環保展，喺今個星期日會公開畀公眾參觀，裏面展示最新嘅環保產品，例如用粟米心做嘅飯盒，用粟米粉做嘅膠袋，用車胎提煉嘅油等，十分新穎。另外佢事先張揚，明年貿發局嘅展覽活動會調高展位收費，約百分之五，經濟好轉，無計！