煲呔外母鮑羅瑞珍原來於本月22號喺澳門山頂醫院過身，終年103歲，噚日喺澳門報紙登咗訃文，鮑老夫人遺體會喺今日移送鏡湖殯儀館，供親友致祭，並會於周日大殮，安葬於澳門舊西洋墳場。
據知煲呔對外母過身好唔開心，鮑老太病重期間，佢都經常港、澳兩邊走，探望鮑老太，今次煲呔都會去澳門奔喪，不過由於煲呔今次堅持係自己私事，冇乜張揚，想低調啲，就算連記者查詢都唔回應。不過有官場中人話，煲呔始終係特首，雖然佢冇乜講，唔想搞到好高調，但八方聽聞有不少官員、議員、商界中人，都諗緊過去澳門致祭鮑老太。有親北京政界人士話，按內地做法，中聯辦等中央機構應該都會送花圈，至於澳門特首何厚鏵會唔會到場，就真係唔知喇！