波浪H請左丁山到「賀菊」食日本菜，兼送一本佢嘅大作──《如何賺一億．金股匯25年實戰紀錄》，直情擺錢落左丁山個袋。睇見本書──《如何賺一億》，左丁山已經食唔落飯，心思思點樣賺一億！發白日夢係唔使資本嘅，左丁山怕呢一世都唔會有一億啦。點解朝思暮想有一億呢？金勞詹逢係見到朋友都講，佢每個月使一百萬，生活都唔知幾寫意。左丁山冇咁大想頭，不過如果有一億嘅話，擺落美國國庫債券，一年收息四百幾萬，一個月用三四十萬，唔使做，幾好呀，諗起就咭咭笑。
波浪H一聲飲杯，靚日本米酒嘅酒香撲上鼻尖，左丁山當堂醒番，唔再發夢，回歸現實，食上等魚生可也。波浪H一個禮拜住五日香港，星期五下晝就去中山住番三晚，佢間大屋佔地一畝半，居住面積四千呎，與女伴享受三晚二人世界，都唔知幾爽，星期一早上就回港，搏殺於金股滙三大市場。波浪H話返中山過周末，生活寧靜，有助於佢諗通啲波浪結構喎。
有腦之人食腦，對住部電腦就可以搵錢，不過「波浪理論」於左丁山，有如希臘文，鬼識咩，不如請波浪H講啦，於是問佢：「𠵱家股市日日升少少，一啲股票升浪不止，但左丁山已經手上冇貨，恨到牙癢癢，請問如何搵銀？」波浪H贈言曰：「升完跌，跌完升，此乃不逆之理，我夜觀天象，日看波浪圖，認為今日無貨者吉，有貨者凶，你手上無貨，恭喜恭喜，最後一浪，甚為洶湧！金盆洗手，此其時也！」
唉，即係又走咗雞啦，唯有細心等待下一浪。問多兩句，波浪H送上名片話：「請登上網睇每日分析，睇一次收五十元。」嘩，上網睇一次要五十蚊？貴唔貴啲呀？回心一諗，人哋有知識產權，將心得放上網任你睇唔睇，冇話強逼，肯自願睇一次就付上五十大元者，當然係覺得或知道長睇有着數先至肯制。屈指一算，每日有五百人睇嘅話，一星期五天，一個月就有五十萬（按四星期計），互聯網真乃「知識分子」創富之恩物也。