立法會噚日辯論施政報告又差啲流會，朝早9點一開波就唔夠法定人數，好彩距離流會前幾廿秒，啲議員陸續趕到，解決燃眉之急。話晒呢幾排日日由朝拗到晚，議員朝早起唔到身嚟開會，都係有少少情有可原嘅。
但唯一一個唔可以遲到嘅就係主席范太。或者立法會工時太長，一直話范太諗住下屆唔選，升級去做祖國嘅人大常委，話晒健康麻麻哋嘅曾憲梓都係時候退休啦。但呢個如意算盤睇怕未必打得響，八方聽人講，曾生個腎𠵱家又唔係好掂，差唔多要靠洗腎度日，但曾生寧願戰死沙場，都唔肯退位讓賢。
話晒曾生唔肯退，其他人都好難勸退佢，范太都係繼續留喺度選立法會，下屆同葉太喺港島區片過啦。