要喺承諾同錢銀之間揀一樣並唔容易，不過開辦一條龍直資學校嘅港大同學會教育基金，就要口齒唔要錢。港同會四年前辦小學部時同家長講，佢哋仔女今年升讀中學部「港大同學會書院」，學費大概22,000蚊一年；點知今年創校時先知計錯數，每年要32,000蚊先夠，教統局亦批准咗。
校長陳鄭美珠話，口齒好重要，所以今年收番22,000蚊，差額由校董會補貼。佢哋今年有160人讀中一，計上嚟一年少收160萬蚊；陳太話𠵱家學費收入，淨係畀16個老師人工都唔夠，所以校董希望明年或收番多啲，大約多5,000蚊。
有家長唔知內情，以為學校開學即預告會加費，向傳媒投訴，又話校方迫家長捐錢。但陳太解釋係有兩名家長自行發起捐款行動，屬自願性質，佢哋各自捐咗五萬蚊先，陳太話啲錢會留畀籌備成立嘅家教會。港同會名譽會長係港大校長徐立之同校長資深顧問程介明，學校嘅校董唔少係老細級人馬。錢，未必係問題。